Azərbaycan Xəbərləri

<span style="color:#FF0000;font-size:18px;">[b]Dollar ucuzlaşmağa, avro isə bahalaşmağa başlayıb[b]</span>

Bakı. Vahab Rzayev - APA-ECONOMICS. Sentyabrın 15-də ABŞ dollarının Azərbaycan manatına qarşı rəsmi məzənnəsi bu ayın əvvəlindən ən minimal həddə çatıb. «APA-ECONOMICS»in məlumatına görə, Azərbaycan Milli Bankının (AMB) rəsmi məzənnəsinə əsasən, 1 dollar 0,8118 manata bərabərdir.

[Beləliklə, ayın əvvəlindən manat dollara qarşı 0,27%, sentyabrın 12-dən isə 0,45% bahalaşıb. Məzənnənin hazırkı səviyyəsi yalnız avqustun ilk dekadasında müşahidə olunub. Manatın məzənnəsinin birdən-birə bu dərəcədə yüksəlməsinin səbəbləri xarici bazarlarda baş verən proseslərlə bağlıdır. Belə ki, bu gün beynəlxalq birjalarda dollar avroya və digər əsas valyutalara qarşı kəskin şəkildə - 1,8% ucuzlaşıb. Bunun əsas səbəbi ABŞ-ın «Lehman Brothers Holdings Inc.» bankının müflisləşməsi haqqında məlumatların yayılması ilə bağlıdır. Bundan əlavə bir sıra bankların likvidliyinin kəskin azalması müşahidə olunur. Vəziyyəti tarazlaşdırmaq üçün Federal Ehtiyat Sistemi (FES) banklar üçün borclanma mexanizmini liberallaşdırıb və girov kimi çıxış edə biləcək aktivlərin siyahısını genişləndirib. FES-in bu addımı bazar iştirakçıları tərəfindən böhrana qarşı görülən tədbir kimi qiymətləndirilsə də, əslində ABŞ-ın maliyyə sistemi barədə mənfi proqnozları daha da möhkəmləndirir. Qeyd edək ki, Azərbaycanda rəsmi məzənnənin ardınca mübadilə məntəqələrində də nağd dolların alış-satış məzənnəsi kəskin şəkildə düşüb. Belə ki, əgər keçən həftənin sonunda məzənnə 0,8140 manata çatmışdırsa (alış), bu gün həmin göstərici orta hesabla 0,8090 manata bərabərdir. Maraqlıdır ki, əks dinamika avronun rəsmi məzənnəsi üzrə müşahidə edilir. Dolların ucuzlaşması avronun bahalaşmasına səbəb olub və sentyabrın 12-i ilə müqayisədə Azərbaycanda 1 avro 1,1421 manatdan 1,721 manatadək və ya 2,6% bahalaşıb.

<span style="color:#FF0000;font-size:18px;">[b]İran öz iştirakı olmadan «Nabucco» layihəsinin icrasını real saymır[b]</span>

[Bakı. Vüqar Mustafayev - APA-ECONOMICS. «Nabucco» qaz boru kəmərinin İranın iştirakı olmadan fəaliyyət göstərməsi mümkün deyil. «APA-ECONOMICS»in «Wiener Zeitung» qəzetinə istinadən verdiyi məlumata görə, bunu İranın neft naziri Qulamhüseyn Nəzəri bəyan edib. Nazir Avstriyanın «Nabucco» layihəsində iştirak edən təmsilçisi OMV neft-qaz şirkətini İranı tezliklə layihə cəlb etməyə və qazın alqı-satqısına dair ikitərəfli sazişi bağlamağa çağırıb. Q.Nəzərinin fikrincə, qaz tədarükünə dair kifayət qədər zəmanətin olmaması fonunda İran resurslarına yüksək tələbat aydın hiss olunur: «Nabucco» boru kəmərinin işinin İranın iştirakı olmadan mümkünsüzlüyünü hamı etiraf edir. Dünyanın təbii qaz resurslarının 16%-nə malik olan ölkəni nəzərə almamaq olmaz». Qeyd edək ki, gələcəkdə kəmərin əsas real təchizatçı kimi Azərbaycan qiymətləndirilir.Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞÂ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildə Avropaya çatdırılması planlaşdırılır.

<span style="color:#FF0000;font-size:18px;">[b]Türkiyənin dövlət qurumu Ermənistandan elektrik enerjisi almaq istəyən şirkətin müraciətini rədd edib[b]</span>

[Ankara - APA. Türkiyənin Enerji Bazarını Düzənləmə Qurumu Rusiyanın "İnter RAO" enerji şirkətinin Türkiyədə fəaliyyət göstərən törəmə şirkəti TGR-in Ermənistandan elektrik enerjisi idxal etmək tələbini rədd edib. APA-nın Türkiyə mətbuatına istinadən verdiyi məlumata görə, TGR-in Şərqi Anadolunun elektrik enerjisinə olan tələbatını ödəmək üçün Ermənistandan elektrik enerjisi almaq istəyi qəbul olunmayıb. Ermənistanla bu sahədə müqavilə imzalamış UNİT şirkəti isə hələlik anlaşmanın təsdiqlənməsi üçün Enerji Bazarını Düzənləmə Qurumuna müraciət etməyib. Türkiyə mətbuatı Xarici İşlər Nazirliyi və Enerji Nazirliyinin bu sövdələşmədən xəbərsiz olduğunu bildirib.

<span style="color:#FF0000;font-size:18px;">[b]Alla Puqaçova: "Maksim Qalkinlə evlənməmişik"[b]</span>

[Moskva-APA. Rusiya estradasının ulduzu Alla Puqaçova yaxın günlərdə şoumen Maksim Qalkinlə ailə quracağı barədə xəbərləri təkzib edib. APA-nın məlumatına görə, sənətçini bu addımı atmağa Moskva patriarxlığının yepiskopu Mark Yeqorevskinin açıqlaması vadar edib. 1994-cü ildə kilsədə Alla Puqaçova ilə Filipp Kirkorovun kəbinini kəsən din xadimi sənətçinin Maksim Qalkinlə ailə qurmağa hazırlaşması barədə xəbərə sərt reaksiya verib: "Alla Borisovna növbəti azyaşlı uşaqla nikaha girməkdənsə, tövbə etmək haqqında düşünsə, yaxşıdır". Alla Puqaçova yenidən evlənəcəyi barədə xəbərləri sarı mətbuatın uydurması adlandırıb: "Bəzi qəzetlər mənim həyatım, Maksim Qalkinlə ailə həyatı quracağım haqqında uydurmalar yazırlar. Mən yox, həmin mətbuat orqanları tövbə etməlidir. İnanmıram ki, hansısa din xadimi məni günahlarımı tövbə etməyə çağırsın, çünki tövbəyə vadar edəcək heç bir günah işlətməmişəm. Əgər ərə getmək istəsəydim, bunu hər kəsdən əvvəl mənim dilimdən eşidərdiniz. Bir daha bəyan edirəm ki, Maksimlə nə kəbin kəsdirməyə, nə də evlənməyə hazırlaşmıram. Biz sadəcə bir yerdə yaşayır və həyatdan ləzzət alırıq. Başqaları isə insanların beyninə belə bir fikir yeritməyə çalışır ki, guya mən yüngül əxlaqlı, erotik hisslərə qapalı həyat keçirən qadınam. Kimsə öz həyatını başqasının ayağına yazmaq istəyir".

<span style="color:#FF0000;font-size:18px;">[b]Gürcüstandakı 50 Azərbaycan məktəbində gürcü dili kursları açılacaq[b]</span>

[Bakı-APA. Sentyabrın 20-dən Gürcüstanda yaşayan azərbaycanlıların cəmiyyətə inteqrasiyasını təmin etmək məqsədilə ilkin olaraq 50 Azərbaycan məktəbində gürcü dili kursları fəaliyyətə başlayacaq. Xarici Ölkələrdə Yaşayan Azərbaycanlılarla İş üzrə Dövlət Komitəsinin mətbuat xidmətindən APA-ya verilən məlumata görə, kursların əlaqələndiricisi Gürcüstanda fəaliyyət göstərən Azərbaycan Mədəniyyət Mərkəzidir. Gələn ilin əvvəlindən isə Gürcüstandakı bütün Azərbaycan məktəblərində və Tbilisi Dövlət Universitetinin Marneuli Şəhər Filialında azərbaycanlılar üçün gürcü dili kursları açılacaq. Məlumata görə, bu günlərdə soydaşlarımızın Gürcüstan cəmiyyətinə inteqrasiyasına kömək məqsədilə 3 dərs vəsaiti - "Gürcü dilini öyrənənlər üçün dərslik", "Gürcücə-Azərbaycanca danışıq lüğəti" və "Gürcü dilinin qrammatikası" işıq üzü görüb. Həmçinin gürcü dilinin qrammatikasına aid 300 dəst cədvəl hazırlanıb.Xarici Ölkələrdə Yaşayan Azərbaycanlılarla İş üzrə Dövlət Komitəsinin maliyyə dəstəyi ilə ilk dəfə olaraq "Azərbaycanca-gürcücə luğət" hazırlanır. Lüğət 20 min sözdən və 2 cilddən ibarət olacaq. Dil kurslarının açılması və dərs vəsaitlərinin çapı da komitənin ayırdığı maliyyə hesabına təmin edilib. Qeyd olunub ki, Gürcüstanda azərbaycanlıların kompakt yaşadığı ərazilərdə 124 Azərbaycan məktəbi var və bu təhsil ocaqlarında 35 min şagird təhsil alır.

<span style="color:#FF0000;font-size:18px;">[b]Novosibirsk Operetta Teatrında üç aylıq rejissorluq təcrübəsi keçmək istəyənlər üçün müsabiqə elan olunub[b]</span>

[Bakı. Ülkər Qasımova-APA. Azərbaycan Dövlət Musiqili Komediya Teatrında rejissorlar arasında müsabiqə keçirilir. Teatrın mətbuat xidmətindən APA-ya bilidirlib ki, müsabiqə Novosibirsk Operetta Teatrında üç aylıq rejissorluq təcrübəsi keçmək istəyən rejissorlar arasında baş tutacaq. Müsabiqədə 28 yaşa qədər ali rejissor təhsilli gənclər iştirak edə bilərlər. Müsabiqədə iştirak etmək istəyən rejissorlar bu ilin oktyabrın 1-dək sənədlərini Musiqili Komediya Teatrının kadrlar şöbəsinə təqdim edə bilərlər.

<span style="color:#FF0000;font-size:18px;">[b]İranda yaşayan azərbaycanlıların həbsi davam edir[b]</span>

[Bakı. Ramil Məmmədli - APA. İran azərbaycanlılarının hüquqları uğrunda hərəkatın fəallarından olan Təbriz şəhər sakini Əli Sədiqi saxlanılıb. Dünya Azərbaycanlıları Konqresindən APA-ya verilən məlumata görə, Təbriz Universitetinin "Yurd" tələbə jurnalının təsisçilərindən olan Ə. Sədiqi sentyabrın 10-da çalışdığı yerdə həbs olunub. O, ölkədə milli ayrı-seçkilik salmaqda ittiham edilir.

<span style="color:#FF0000;font-size:18px;">[b]Bakının sosial müdafiə mərkəzlərində əhalinin ünvanlı sosial yardımla bağlı şikayətləri araşdırılır[b]</span>

[Bakı. İlhamə İsabalayeva - APA-ECONOMICS. Azərbaycan Əmək və Əhalinin Sosial Müdafiəsi Nazirliyi ünvanlı sosial yardımla əlaqədar vətəndaşlardan daxil olan ərizə və şikayətləri yerində araşdırmaq məqsədi ilə Bakının yerli sosial müdafiə mərkəzlərində monitorinq keçirir. Nazirliyinin şöbə müdiri Natiq Qasımov «APA-ECONOMICS»ə bildirib ki, son 2 ay ərzində respublikanın 47 rayonunda bu sahədə monitorinq aparılması məqsədilə 969 ərizəçi qəbul edilib. Qəbul yerli icra orqanları, bələdiyyə və nazirliyin yerli strukturlarının nümayəndələrinin iştirakı ilə keçirilib. Bu monitorinqlər nəticəsində 114 nəfərə sosial yardımın alınması üçün zəruri olan sənədlərin toplanmasında yardım göstərilib: «Buna baxmayaraq, 31 nəfər ərizəçi yenə iddialı qalıb. İddialı olanlar əsasən, əmək qabiliyyətli olub işləmək istəməyənlər və qanunvericiliyin tələblərinə uyğun olmayanlardır. Bununla yanaşı, monitorinq zamanı yerli Əhalinin Sosial Müdafiəsi Mərkəzlərinə müraciət edənlərə mövcud qanunvericiliyin ətraflı izah edilmədiyi, kobud rəftarlara yol verildiyi də aşkarlanıb». N.Qasımov bildirib ki, bu nöqsanlarla əlaqədar mərkəzlərdə çalışan 29 baş məsləhətçiyə töhmət verilib. Şöbə müdirinin sözlərinə görə, bundan sonra nazirliyinin yerli strukturları tərəfindən əhaliyə göstərilən xidmətin səviyyəsinin artırılması, əhali arasında maarifləndirmə işini gücləndirmək məqsədi ilə ildə bir dəfə belə monitorinqlər keçiriləcək.

<span style="color:#FF0000;font-size:18px;">[b]Azərbaycanda radiomonitorinq sisteminin təşkili məsələsini alman və azərbaycanlı mütəxəssisləri birlikdə müzakirə ediblər[b]</span>

[Bakı. İlhamə İsabalayeva - APA-ECONOMICS. Azərbaycan Rabitə və İnformasiya Texnologiyaları Nazirliyi Dövlət Radiotezliklər İdarəsinin (DRİ) baş mühəndisi İlham Əfəndiyev və tezliklər şöbəsinin rəisi Nadir Sadıqov Almaniyada səfərdə olublar. İdarədən «APA-ECONOMICS»ə verilən məlumata görə, bu gün yekunlaşan səfər çərçivəsində Hamburq və Münhendə aidiyyəti qurumların nümayəndələri ilə görüşlər keçirilib. Görüşlərdə Azərbaycanda radiomonitorinq sisteminin təşkili məsələsi müzakirə edilib, Almaniyanın bu sahədəki təcrübəsi öyrənilib. Qeyd edək ki, 2008-ci ilin sonunadək Azərbaycan ölkənin efir məkanını qorumağa imkan verəcək milli radiomonitorinq sisteminin quraşdırılması üzrə şərt və təklifləri müəyyənləşdirməyi planlaşdırıb. Bu sistem vasitəsilə tezliklərin səmərəli istifadəsinin, elektron vasitələrin qeydiyyatı və uçotu, qeydiyyatdan kənar istifadənin qarşısının alınması, efir üzərində nəzarət, efir müdaxiləsinin qarşısının alınması təmin ediləcək.

<span style="color:#FF0000;font-size:18px;">[b]Ərdoğan: "Dünya miqyasında tanınan komandamız var"[b]</span>

"Artıq daha böyük hədəflər barədə düşünmək zamanıdır"

[Bakı. Kənan Həsənov - APA-SPORT. "Üzüntülü və sevincli keçən uzun illərin ardından dünya miqyasında tanınan bir milli komandamız var". "APA-SPORT"un məlumatına görə, bu sözləri Türkiyənin baş naziri Rəcəb Tayyib Ərdoğan söyləyib. Türkiyə Futbol Federasiyasının İdman Nazirliyi ilə birgə gerçəkləşdirdiyi "Milli Qürur, Milli Forma" sərgisinin açılışına qatılan Ərdoğan yığmanın böyük yol qət etdiyini vurğulayıb: "Milli komandamız 1923-cü ildən indiyədək 455 oyuna çıxıb. Böyük hesabla uduzduğumuz, heç-heçələrə sevindiyimiz anlar olub. İndi isə yarımfinal, final haqda planlar qururuq. Bu səviyyəyə çatmağımızda hamının əməyi var".Baş nazir bundan sonra qarşıya daha böyük hədəflər qoymağın vacibliyini deyib: "Artıq daha böyük hədəflər barədə düşünmək zamanıdır. Bunu reallaşdırmaq üçün nə lazımdırsa edəcəyik. İnşallah bayrağımızı ən yüksək zirvələrə yüksəldəcəyik. Milli komandanın gəldiyi yer, Türkiyəyə və türk millətinə işıq tutur. Yığmamız dünyada 10-cu yerə yüksələrkən, Türkiyə dünya iqtisadiyyatında 17-ci pillədə yer alır. Yəni, bu işlər paralel gedir. Futbol dünyada milyardlarca insanın diqqətini çəkən bir sahədir".

<span style="color:#FF0000;font-size:18px;">[b]Rusiyada azərbaycanlının maşınından iki tapança tapılıb[b]</span>

[Saratov - APA. Ötən şənbə günü Rusiyada saxlanılan azərbaycanlının avtomobilindən silah tapılıb. APA-nın Rusiya mənbələrinə istinadən verdiyi məlumata görə, Saratov-Tatişşevo yolunda Dövlət Avtomobil Müfəttişliyinin əməkdaşları "Jiquli" markalı avtomaşını saxlayıblar. Avtomaşına baxış zamanı "Osa lazer" və "Makarov" (qaz tipli) markalı iki tapança aşkarlanaraq götürülüb. Sürücü, 21 yaşlı Azərbaycan vətəndaşı "Makarov"u bir neçə saat əvvəl Lenin rayonunda tapdığını, "Osa lazer"in isə "Jiquli"nin sahibinə məxsus olduğunu söyləyib. Ancaq milislər ona inanmayıblar. Faktla bağlı araşdırma aparılır.

<span style="color:#FF0000;font-size:18px;">[b]Azərbaycan teatrının 136-cı mövsümünün təntənəli açılış mərasimi keçirilib[b]</span>

[Bakı. Ülkər Qasımova - APA. Bu gün Səməd Vurğun adına Dövlət Rus Dram Teatrının qarşısında Azərbaycanda 136-cı teatr mövsümünün təntənəli açılış mərasimi keçirilib. APA-nın məlumatına görə, tədbirdə paytaxtda fəaliyyət göstərən teatr kollektivləri iştirak ediblər. Dövlət Rus Dram Teatrı, Dövlət Akademik Milli Teatrı, Dövlət Gənc Tamaşaçılar Teatrı, Pantomim Teatrı və Dövlət Kukla Teatrının kollektivləri hazırladıqları maraqlı nömrələrlə çıxış ediblər. Xalq artistləri Siyavuş Aslan, Yaşar Nuri, Firəngiz Mütəllimova, Nurəddin Mehdixanlı, İlham Əsgərov, İlham Namiq Kamal, Məleykə Əsədova, rejissorlar Mərahim Fərzəlibəyov, Bəhram Osmanov və başqaları mərasimdə çıxış edərək Azərbaycan teatrlarına uğurlar arzulayıblar. Tədbirdə çıxış edən mədəniyyət və turizm naziri Əbülfəs Qarayev son illər Azərbaycan teatrının inkişafı ilə əlaqədar görülən işlərdən danışıb.

<span style="color:#FF0000;font-size:18px;">[b]Novruz Məmmədov: "Azərbaycan prezidentinin Rusiyaya səfərinə ehtiyac var"[b]</span>

Bakı. Tamara Qriqoriyeva - APA. Azərbaycan prezidenti İlham Əliyevin Moskvaya səfəri Rusiya prezidentinin dəvəti ilə reallaşır. APA-nın xəbərinə görə, bu barədə Prezident Aparatı beynəlxalq əlaqələr şöbəsinin müdiri Novruz Məmmədov bildirib.

[Bu səfərə ehtiyac olduğunu deyən şöbə müdiri səfər çərçivəsində prezidentlərin ikitərəfli münasibətlər, regiondakı vəziyyət və son hadisələrlə bağlı müzakirələr aparacaqlarını vurğulayıb.Qeyd edək ki, İ. Əliyev bu gün Rusiyaya yola düşüb.

<span style="color:#FF0000;font-size:18px;">[b]Şöbə müdiri: "Əsas məsələ Cənubi Qafqazda əməkdaşlığın ən səmərəli, optimal formalarından birinə nail olmaqdır"[b]</span>

[Bakı. Tamara Qriqoriyeva - APA. "Cənubi Qafqazda əməkdaşlığın müxtəlif formaları ilə bağlı xüsusən son zamanlar müəyyən təşəbbüslər var. Amma əsas məsələ Cənubi Qafqazda əməkdaşlığın ən səmərəli, optimal formalarından birinə nail olmaqdır". Bu sözləri Prezident Aparatı beynəlxalq əlaqələr şöbəsinin müdiri Novruz Məmmədov İranın xarici işlər naziri Mənuçöhr Mottakinin ölkəsinin Qafqaz Sülh və Sabitlik Platformasında iştirak etmək niyyətində olması barədə fikirlərinə münasibət bildirərkən deyib.Azərbaycan üçün hər şeydən əvvəl Dağlıq Qarabağ münaqişəsinin, regiondakı digər problemlərin həllinin vacib olduğunu qeyd edən şöbə müdirinin fikrincə, irəli sürülən təklif və təşəbbüslərin hansı nəticələri verəcəyi hələlik məlum deyil: "Biz istəyirik ki, Cənubi Qafqazda sülh olsun və beynəlxalq hüquq normalarına riayət edilsin".

<span style="color:#FF0000;font-size:18px;">[b]Azərbaycan prezidenti Rusiyaya gedib[b]</span>

Bakı - APA. Azərbaycan prezidenti İlham Əliyev sentyabrın 15-də Moskvaya yola düşüb.

[Bu barədə APA-ya prezidentin mətbuat xidmətindən məlumat verilib. Səfər Rusiya prezidenti Dmitri Medvedyevin dəvəti ilə baş tutub.

<span style="color:#FF0000;font-size:18px;">[b]YAP seçki kampaniyasına mitinqlə start verəcək[b]</span>

Bakı. Elnur Məmmədli-APA. Yeni Azərbaycan Partiyası (YAP) seçki kampaniyasına mitinqlə start verəcək. YAP-ın mətbuat xidmətindən APA-ya daxil olan məlumata görə, artıq mitinqin keçiriləcəyi yer də müəyyənləşdilib. YAP seçki-təşviqat mitinqini Səbayel rayonu ərazisində yerləşən Bibiheybət stadionunda keçirəcək.

[Qeyd edək ki, prezidentliyə namizədlərin kütləvi tədbirlər keçirməsi üçün Bakı şəhər İcra Hakimiyyəti tərəfindən yerlər müəyyənləşdirilib və həmin siyahı açıqlanıb. YAP-ın mitinq keçirəcəyi Bibiheybət stadionu da həmin siyahıya daxildir.Xatırladaq ki, YAP prezident seçkilərində Azərbaycan prezidenti, partiyanın sədri İlham Əliyevin namizədliyini irəli sürüb.

<span style="color:#FF0000;font-size:18px;">[b]Ermənistan Silahlı Qüvvələri Azərbaycanın mövqelərini atəşə tutub[b]</span>

[Bakı-APA. Ermənistan Silahlı Qüvvələrinin bölmələri sentyabrın 15-də saat 19.45-dən 20.35-dək Goranboy rayonunun ərazisindəki adsız yüksəkliklərdə və Tapqaraqoyunlu kəndi yaxınlığında yerləşən mövqelərdən, saat 21.00-dan 21.20-dək, 23.00-dan 23.20-dək və sentyabrın 16-da saat 05.30-dan 05.55-dək Füzuli rayonunun ərazisindəki adsız yüksəkliklərdə, Qərvənd, Aşağı Veysəlli və Qaraxanbəyli kəndləri yaxınlığında yerləşən mövqelərdən Azərbaycan Silahlı Qüvvələrinin üzbəüz mövqelərini avtomat və pulemyotlardan atəşə tutublar. Müdafiə Nazirliyinin mətbuat xidmətindən APA-ya verilən məlumata görə, bütün hallarda düşmən cavab atəşi ilə susdurulub, itki yoxdur.

<span style="color:#FF0000;font-size:18px;">[b]«Sülh Naminə Tərəfdaşlıq» proqramı çərçivəsində tədbirlər keçiriləcək[b]</span>

[Bakı-APA. NATO ilə Azərbaycan Respublikası arasında imzalanmış fərdi proqrama uyğun olaraq, «Sülh Naminə Tərəfdaşlıq» proqramı çərçivəsində 17-19 sentyabr tarixlərində Belçikanın Brüssel şəhərində Azərbaycanın FTƏP üzrə qiymətləndirilməsinin 26+1 formatında yekun iclası keçiriləcək. Bu barədə APA-ya Müdafiə Nazirliyinin mətbuat xidmətindən bildirilib. Məlumata görə, NATO Yanacaq Komitəsinin işçi görüşü 17-19 sentyabrda baş tutacaq. Proqram çərçivəsində Macarıstanın Budapeşt şəhərində Qərargah zabitləri üçün keçiriləcək hərbi terminologiya kursu sentyabrın 22-dən oktyabrın 3-dək davam edəcək. Latviyanın Yurmala şəhərində isə NATO Müdafiə Siyasəti və Strategiyası üzrə SNT konfransı 22-23 sentyabrda baş tutacaq. İtaliyanın Neapol şəhərində Jooperative Mako 2009 və Jooperative Marlin 2009 təlimlərinin ilkin planlaşdırma konfransı 22-24 sentyabrda keçiriləcək. «Quru Qoşunları üzrə Kommunikasiya və İnformasiya Sistemləri» mövzusunda işçi görüşü İspaniyanın Madrid şəhərində 22-25 sentyabrda baş tutacaq.

<span style="color:#FF0000;font-size:18px;">[b]ABŞ səfiri Ann Dersi: "Qafqaz regionundakı münaqişələri tezliklə həll etmək çox vacibdir"[b]</span>

Bakı. Tamara Qriqoryeva-APA. "Qafqaz Sabitlik və Əməkdaşlıq Platforması inkişaf edən ideyadır. Biz bu prosesi diqqətlə izləyirik." APA-nın məlumatına görə, bu açıqlamanı jurnalistlərə ABŞ-ın Azərbaycandakı səfiri Ann Dersi verib.

[Səfir bildirib ki, ABŞ Qafqaz və Xəzər dənizi regionunda yerləşən ölkələri inkişaf edən, demokratik və stabil görmək istəyir: "Gürcüstanda bu yaxınlarda baş verən hadisələr onu sübut etdi ki, regionda mövcud olan münaqişələri tezliklə həll etmək çox vacibdir. ABŞ-ın vitse-prezidenti Riçard Çeyni Azərbaycanda səfərdə olarkən qeyd etdi ki, ABŞ Azərbaycanın ərazi bütövlüyünü tanıyır və Dağlıq Qarabağ münaqişəsinin beynəlxalq hüquq normaları çərçivəsində, danışıqlar yolu ilə və Azərbaycanın ərazi bütövlüyü prinsipi əsasında həll olunmasını istəyir. ABŞ bu sahədə həmişə aktivlik göstərib və bu belə də davam edəcək". Səfir qeyd edib ki, ABŞ dövlət katibinin müavinini köməkçisi Metyu Brayza hazırda regiondadır və o, tezliklə Bakıya səfər edəcək: "Səfər zamanı elə həmin məsələlər üzrə danışıqlar aparacaq. ABŞ dövlətinin mövqeyi ondan ibarətdir ki, Qafqazın suveren və müstəqil dövlətləri öz yollarını özləri seçməlidir və özləri də seçirlər".

<span style="color:#FF0000;font-size:18px;">[b]NATO-Gürcüstan Komissiyasının yaradılması barədə saziş imzalanıb[b]</span>

[Tiflis - APA. Tiflisdə NATO-Gürcüstan Komissiyasının yaradılması barədə çərçivə sazişi imzalanıb. APA-nın "Novosti-Qruziya" agentliyinə istinadən verdiyi məlumata görə, Şimali Atlantika Şurasının bütün üzv ölkələrin səfirlərinin iştirakı ilə Gürcüstan paytaxtında keçirilən yığıncağında sazişin imzalanma mərasimi keçirilib. Alyansın baş katibi Yaap de Hoop Sxeffer bildirib ki, komissiyanın yaradılması NATO ilə Gürcüstan arasındakı münasibətlərin dərinləşdirilməsi üçün yeni imkanlar açır: "Biz fərdi tərəfdaşlıq və intensiv dialoq planlarının həyata keçirilməsindəki uğurları nəzərə alaraq münasibətlərin yeni formatına keçməliyik. Dekabrda keçiriləcək sammitdə xarici işlər nazirləri tərəfindən qiymətləndirmə aparılacaq və Gürcüstana üzvlük üçün Fəaliyyət Planı təqdim edilməsi barədə qərar qəbul olunacaq". Gürcüstan prezidenti Mixail Saakaşvili isə bəyan edib ki, NATO Şurasının Tiflisdə iclas keçirməsi Gürcüstanın tək olmadığına dair bütün dünyaya verilən siqnaldır. O, NATO-Gürcüstan Komissiyasının yaradılmasını alqışlayıb: "Gürcüstanla NATO arasında münasibətlər daha da güclənməlidir. NATO-ya inteqrasiya bizim yolumuzdur və biz konkret istiqamət üzrə hərəkət edirik".

<span style="color:#FF0000;font-size:18px;">[b]Əsgər Ələkbərov: "Azərbaycanda cinayətlərin üstünün açılma səviyyəsi 90 faizə çatıb"[b]</span>

[Bakı. Viktoriya Dementyeva-APA. "Polisin fəaliyyətinin zəiflədiyini deməzdim. Əksinə polis orqanları əvvəlkindən də yaxşı fəaliyyət göstərir. Hazırda cinayətlərin üstünün açılma səviyyəsi 90 faizə çatıb". APA-nın məlumatına görə, bu açıqlamanı jurnalistlərə daxili işlər nazirinin müavini Əsgər Ələkbərov verib. O ötən həftə Səbayel rayonu ərazisində 150 nəfər Hindistan və Pakistan vətəndaşının saxlanması barədə məlumatları da təkzib edib: "Ola bilər ki, bu miqrasiya məsələləri ilə bağlı problemdir, amma saxlananların sayı şişirdilib. Həmin şəxslərin ölkə ərazisində qalması üçün qanunla müəyyən edilmiş müddət başa çatıb və buna görə də vizaların müddətini uzatmalıdırlar. Əlbəttə ki, xarici vətəndaş ölkə ərazisində qeyri-qanuni qalırsa, o saxlanaraq Dövlət Miqrasiya Xidmətinə gətirilir. Həmin şəxs hətta ölkədən deportasiya da oluna bilər".

<span style="color:#FF0000;font-size:18px;">[b]Təbriz Universitetinin idman elmləri fakültəsinin nümayəndə heyəti Bakıya gələcək[b]</span>

[Bakı-APA. İran İslam Respublikası Təbriz Universitetinin İdman və Bədən Tərbiyəsi Assosiasiyasının İdman elmləri fakültəsinin 4 nəfərdən ibarət nümayəndə heyəti 17-20 sentyabr tarixlərində Bakıda səfərdə olacaq. Gənclər və İdman Nazirliyinin mətbuat xidmətindən APA-ya verilən məlumata görə, səfərin əsas məqsədi Azərbaycanla idman və idman təhsili sahəsində qarşılıqlı əməkdaşlıq əlaqələri qurmaq, Azərbaycan Dövlət Bədən Tərbiyəsi və İdman Akademiyasının fəaliyyəti ilə tanış olmaqdır. Qonaqlar Azərbaycan Dövlət Bədən Tərbiyəsi və İdman Akademiyasının professor, müəllim heyəti ilə fikir mübadiləsi aparacaq, nəzəri və praktik dərslərdə iştirak edəcəklər. Bundan başqa, nümayəndə heyətinin Gənclər və İdman Nazirliyində, Milli Olimpiya Komitəsində görüşləri nəzərdə tutulub.

<span style="color:#FF0000;font-size:18px;">[b]Polşa prezidenti Azərbaycana gələcək[b]</span>

Bakı. Viktoriya Dementyeva - APA. Noyabrın 13-də Polşa prezidenti Lex Kaçinski Bakıda keçiriləcək IV Enerji sammitində iştirak etmək üçün Azərbaycana gələcək.

[Bu barədə APA-ya Polşanın Azərbaycandakı səfiri Kşiştov Krayevski məlumat verib. O, səfərin Azərbaycan prezidentinin dəvəti əsasında reallaşacağını bildirib. Qeyd edək ki, enerji ehtiyatlarının nəqlinin müxtəlifləşdirilməsinin müzakirə ediləcəyi sammitdə Litva və Estoniya prezidentləri də iştirak edəcək.

<span style="color:#FF0000;font-size:18px;">[b]AMB-nin rəsmi valyuta məzənnələri[b]</span>

[1 USD

<span style="color:#FF0000;font-size:18px;">[b]Prezidentliyə namizədlərin seçicilərlə görüşlər keçirməsi üçün Azərbaycan paytaxtında 5 zal ayrılıb - TAM SİYAHI[b]</span>

Bakı. Elnur Məmmədli - APA. Prezident seçkilərinin təbliğat-təşviqat kampaniyası zamanı namizədlərin seçicilərlə görüşlər keçirməsi üçün Bakı şəhər İcra Hakimiyyəti (BŞİH) paytaxtda 5 zal ayırıb.

[Bu barədə APA-ya BŞİH-nin ictimai təşkilatlar və siyasi partiyalarla iş şöbəsinin müdiri Zaur Ramazanov məlumat verib. Onun sözlərinə görə, qapalı zallarda keçiriləcək görüşlər üçün Bakı və Məmmədyarov kinoteatrlarının zalları, İsgəndərov, Tağıyev və Səttar Bəhlulzadə adına Mədəniyyət Sarayları ayrılıb. Qeyd edək ki, BŞİH mitinqlər üçün də paytaxtda 11 yer ayırıb.

<span style="color:#FF0000;font-size:18px;">[b]Dow Jones indeksi 4,42%, Nasdaq 3,6%, S&P 500 isə 4,71% enib[b]</span>

[Bakı. Vüqar Mustafayev - APA-ECONOMICS. Sentyabrın 15-də Amerika bazarlarında Dow Jones indeksi 4,42% - 10917,51 bəndədək, Nasdaq 3,6% - 2179,91 bəndədək, S&P 500 isə 4,71% - 1192,7 bəndədək enib. «APA-ECONOMICS»in məlumatına görə, «Lehman Brothers»in səhmləri 94%, AIG sığorta şirkətinin səhmləri 61%, «JPMorgan Chase» və «Citigroup»un müvafiq olaraq 10,1% və 15,1%, «Washington Mutual» bankının 26,7%, «American Express»in 9%, «Bank of America»nın 21,3%, «General Electric»in 8% ucuzlaşıb. Avropa fond birjalarında Britaniya FTSE 100 indeksi 3,92% - 5204,2 bəndədək, Almaniya DAX-ı 2,74% - 6064,16 bəndədək, Fransa CAC-40-ı isə 3,78% - 4168,97 bəndədək düşüb. «Royal Bank of Scotland»ın qiymətli kağızları 13%, «Barclays»ın 13%, «BNP Paribas»ın 7,2%, «Deutsche Bank»ın 7,3%, «Total» neft şirkətinin 5% ucuzlaşıb. Dünya bazarında avronun dollara qarşı məzənnəsi 1,4192 dollar təşkil edib.

<span style="color:#FF0000;font-size:18px;">[b]Nağd valyutanın mübadilə məzənnələri[b]</span>

[Alış/ Satış

<span style="color:#FF0000;font-size:18px;">[b]Ronaldonun yeddi avtomobili var[b]</span>

[Bakı. Kənan Həsənov - APA-SPORT. İngiltərənin "Mançester Yunayted" klubunun yarımmüdafiəçisi Kriştiano Ronaldo avtomobil "xəstə"sidir. "APA-SPORT"un məlumatına görə, portuqaliyalı futbolçu bu yaxınlarda "Bentley Continental GT Speed" markalı avtomobil alıb. Ötən ay 440 min avroya "Rolls Royce Phantom"a sahib çıxan 23 yaşlı futbolçu bu avtomobilin nömrəsinə əlavə olaraq 180 min avro ödəyib. Son "bazarlıq"dan sonra Ronaldonun avtomobillərinin sayı yeddiyə çatıb. Hazırda onun qarajında iki "Porsche Cayennes", "BMW M6", "Porsche 911", "Ferrari F430" ve "Bentley Continental GT Speed" və "Rolls Royce Phantom" var.

<span style="color:#FF0000;font-size:18px;">[b]MDB müşahidəçiləri sabahdan Azərbaycanın regionlarında seçkiqabağı vəziyyəti öyrənməyə başlayacaqlar[b]</span>

[Bakı. Laçın Sultanova - APA. Prezident seçkilərini izləyəcək MDB Müşahidə Missiyasının dünən Bakıda açılmış qərargahının üzvləri sabahdan Azərbaycanın regionlarına səfərə çıxacaqlar. Qərargah rəhbərinin müavini Oleq Kuleba APA-ya bildirib ki, müşahidəçilər sabah Qaradağ, Lənkəran, Salyan, Masallı, Astara, Cəlilabad və Biləsuvar rayonlarında olacaq, orada seçkilərə hazırlıq və təbliğat işinin necə aparılması, namizədlər üçün eyni şəraitin yaradılıb-yaradılmaması ilə maraqlanacaqlar. O. Kuleba bildirib ki, oktyabrın əvvəlində qərargahın regionlarda, o cümlədən Lənkəranda nümayəndəlikləri açılacaq. Qərargah üzvləri artıq MSK sədri Məzahir Pənahov və baş nazirin müavini Əli Həsənovla görüşüblər, seçkilərdə iştirak edən namizədlər, seçkilərə hazırlıq barədə ətraflı məlumat alıblar. Bir neçə müxalifət partiyasının seçkiləri boykot etməsinə münasibət bildirən O. Kuleba bunu onların öz işi adlandırıb. O, həmin partiyaların rəhbərləri ilə görüşəcəklərini də istisna etməyib. Qeyd edək ki, MDB Müşahidəçi Missiyasına qurumun icra katibi Sergey Lebedev rəhbərlik edir. O, Bakıya seçki günü, qərargahın rəhbəri Yevgeni Sloboda isə oktyabrın 2-də gələcək. Hazırda qərargahda 3 müşahidəçi çalışır, seçkilərə kimi onların sayı 30-a çatdırılacaq. Seçkilər günü isə səsverməni 250 MDB müşahidəçisinin izləyəcəyi gözlənilir.

<span style="color:#FF0000;font-size:18px;">[b]Levon Ter-Petrosyan: "Serj Sarkisyan ölkəni oğru qanunları ilə idarə edir"[b]</span>

[İrəvan - APA. Sentyabrın 15-də Levon Ter-Petrosyanın liderlik etdiyi Erməni Milli Konqresi İrəvanın mərkəzində mitinq keçirib. APA-nın erməni saytlarına istinadən verdiyi məlumata görə, mitinqdə çıxış edən sabiq prezident Ermənistandakı mövcud hakimiyyətin mahiyyətinin dəyişmədiyini, rejimin dövlətin qanunlarını deyil, oğru qanunlarını rəhbər tutduğunu bildirib: "Özbaşınalıq, talançılıq o səviyyəyə çatıb ki, nə siyasətdə, nə iqtisadiyyatda heç bir irəliləyiş yoxdur, dövlət reketi hakimiyyətin fəaliyyətinin əsas məzmununu təşkil edir. Hakimiyyətin cinayətkar iqtisadi siyasəti bizə ağır qış vəd edir, yazda isə dərin böhran gözlənilir". L. Ter-Petrosyan deyib ki, Robert Köçəryanın dövründə hakimiyyət monolit olsa da, indi çat verir. Buna misal kimi o, Türkiyə prezidenti Abdulla Gülün Serj Sarkisyanın dəvəti əsasında Ermənistana səfəri zamanı hökumətdə təmsil olunan daşnakların etiraz aksiyası keçirməsini göstərib. Müxalifət liderinin fikrincə, Ermənistan heç vaxt indiki qədər xarici təzyiqə məruz qalmayıb: "Adətən qeyri-legitim, korrupsioner və çirkab içində olan hakimiyyətlər bu cür təzyiqə qalır". Keçmiş dövlət başçısının sözlərinə görə, Serj Sarkisyan ölkənin maraqlarını qurban vermək bahasına özünü legitimləşdirir və "erməni soyqırımı", erməni-türk münasibətləri kimi məsələlərdə güzəştlərə hazır olduğunu nümayiş etdirir. O, Dağlıq Qarabağ probleminin həllinin də təhlükə altında olduğunu söyləyib: "Mən dünyada Dağlıq Qarabağın müstəqilliyini tanıyacaq dövlət görmürəm. Üstəlik, Qərb Rusiyanın acığına Dağlıq Qarabağ münaqişəsinin həlli prosesinə aktiv qoşulmaq istəyir, Serj Sarkisyan isə sanki hipnoz altında bu basqılara boyun əyir". Ter-Petrosyan Ermənistan-Türkiyə-Azərbaycan formatında keçiriləcək üçtərəfli görüşü çox təhlükəli adlandırıb: "Bu reveranslarla Serj Sarkisyan Dağlıq Qarabağ probleminin həllini kifayət qədər ağırlaşdıra bilər. Öz eqoist yanaşmaları ilə o, Dağlıq Qarabağ problemini hərraca çıxarıb". L. Ter-Petrosyan öz hakimiyyəti dövründə dəfələrlə üçtərəfli formatda görüşlərə qarşı çıxdığını xatırladıb. Qeyd edək ki, Ermənistan müxalifətinin növbəti mitinqi sentyabrın 26-da keçiriləcək.

<span style="color:#FF0000;font-size:18px;">[b]Ekspertlər ABŞ dollarının yüksəlməsinin səbəblərini axtarır[b]</span>

[Bakı. Vahab Rzayev - APA-ECONOMICS. Dünya bazarlarında dolların məzənnəsinin yüksəlişi ilə bağlı müşahidə olunanlar iqtisadi məntiqdən çox uzaqdır. Bununla yanaşı, ABŞ birjalarında indekslər də yüksəlir. Bəzi ekspertlər dolların avronun ucuzlaşması fonunda bahalaşdığını söyləyir. Lakin bunun Avropanın makroiqtisadi və ya maliyyə amilləri ilə bağlı olmadığı bəllidir. Bütün analitiklər bu prosesin maliyyə amilləri ilə bağlı olmadığını etiraf edirlər. Əslində, ABŞ indekslərinin yüksəlməsinin əsas səbəbi bu ölkənin Maliyyə Nazirliyinin bu il sentyabrın 7-də yaydığı məlumatla bağlıdır. Həmin məlumat ABŞ-ın ipoteka bazarında əsas pay sahibi olan «Fannie Mae» və «Freddie Mac» şirkətlərinin dövlət idarəetməsinə keçirilməsi ilə bağlı idi. Bu şirkətlər 5 trln. dollar həcmində ipoteka öhdəliklərinə malikdir. Məhz bu məlumat sonda dünyada investorlar üçün müsbət təkan rolu oynayıb və nəticədə, fond bazarında yüksəlişə səbəb olub. Ekspertlərin fikrincə, ipoteka şirkətlərinin dövlət idarəetməsinə keçməsi ABŞ-da inflyasiyanın yüksəlməsinə səbəb olacaq. Bu isə ABŞ-ın iqtisadiyyatının bərpasının yalnız başlanğıcıdır. Belə halda, yəni iqtisadiyyatın zəif olduğu və faktiki qeyri-sabit şəraitdə dolların yüksəlməsinin səbəbləri naməlum qalır.Qeyd edək ki, proses Rusiya bazarlarına da təsirsiz ötüşməyib. Əsas indekslərin düşməsi və rublun ucuzlaşması tendensiyası müşahidə olunur.

<span style="color:#FF0000;font-size:18px;">[b]Ukraynada "narıncı koalisiya"nın dağıldığı rəsmən elan edilib[b]</span>

Kiyev - APA. Ukrayna Ali Radasının sədri Arseni Yasenyuk 2007-ci il noyabrın 29-da "Yuliya Timoşenko" və "Bizim Ukrayna-Xalq Özünümüdafiəsi" blokları tərəfindən yaradılmış demokratik koalisiyanın dağıldığını rəsmən elan edib.

[APA-nın "UNİAN"a istinadən verdiyi məlumata görə, A. Yasenyuk "Kimsə bir dəqiqəlik sükut istəyirmi? Heç lazım da deyil", deyə deputatlarla zarafatlaşıb. O, parlamentin sədri vəzifəsinə yeni namizəd irəli sürməyi də təklif edib. Spiker bu gün Ukraynanın siyasi tarixində səhifələrdən birinin qapandığını və yeni səhifə açıldığını söyləyib: "Mən bunu siyasi apokalipsis adlandırmazdım. Bəli, bu, demokratiya üçün daha bir sınaqdır. Amma mən ümid edirəm ki, bu sınaqdan birlikdə uğurla keçəcəyik". Söz alan Regionlar Partiyasının lideri Viktor Yanukoviç isə növbədənkənar seçkilərin keçirilməsinin əleyhinə olduqlarını bildirib: "Bu gün biz qeyri-adi tarixi hadisənin şahidi olduq. Belə demək mümkünsə, demokratik koalisiyanı gətirən araba son mənzilə çatıb - düşün aşağı". Kommunist Partiyasının lideri Pyotr Simonenko isə prezident Viktor Yuşşenkonun impiçmenti proseduruna başlamağı vacib sayıb: "Yuşşenko cinayətkardır! Bizim belə deməyə əsasımız var. Onun hakimiyyətdən kənarlaşdırılması proseduruna başlamaq və Ukraynanı bu millətçi güruhdan azad etmək lazımdır". P. Simonenko prezident postunu ləğv etməyə də çağırıb.

<span style="color:#FF0000;font-size:18px;">[b]Naxçıvanda hərbi parad keçiriləcək[b]</span>

Naxçıvan - APA. Sentyabrın 17-də Naxçıvan Muxtar Respublikasının (MR) paytaxtı Naxçıvan şəhərində hərbi parad keçiriləcək. APA-nın məlumatına görə, Naxçıvan Qarnizonunun yaranmasının 16-cı ildönümü münasibətilə keçiriləcək hərbi keçidin təşkili üçün artıq ilkin hazırlıqlara başlanılıb.

[Bununla bağlı Naxçıvan-Şahbuz magistralında avtomobillərin hərəkəti müvəqqəti məhdudlaşdırılıb, hərbi texnikalar yola düzülüb. Hərbi paradda onlarla hərbi və zirehli texnikanın, o cümlədən MR-dəki müxtəlif qoşun növlərinin əsgər və zabit heyətinin nizami keçidi olacaq.

<span style="color:#FF0000;font-size:18px;">[b]Azərbaycanda avro ilə aparılan əməliyyatların həcmi 2,2 dəfə artıb[b]</span>

[Bakı. Vahab Rzayev - APA-ECONOMICS. Cari ilin yanvar-iyul ayları ərzində Azərbaycanın daxili valyuta bazarında Avropanın vahid valyutası ilə aparılan alqı-satqı əməliyyatlarının həcmi 2 898 682,3 min avro təşkil edib. Bu da 2007-ci ilin yanvar-iyul ayları ilə müqayisədə 2,2 dəfə çoxdur. Azərbaycan Milli Bankdan (AMB) «APA-ECONOMICS»ə verilən məlumata əsasən, dövriyyənin əsas hissəsi bankdaxili mübadilə əməliyyatların payına düşür. Burada əməliyyatların ümumi həcmi 1 797 196,6 min avro təşkil edib ki, bunun da 885 661,1 mini alış, 911 535,5 mini satışın payına düşür. Daxili valyuta bazarının digər seqmentlərində isə aşağıdakı göstəricilər qeydə alınıb: birja elektron sistemində ticarət - 7 567 min avro, açıq banklararası valyuta bazarı - 1 093 918,7 min avro.Avro üzrə aparılan valyuta əməliyyatlarının məqsədləri isə aşağıdakı kimi olub: 1 405 187,3 min avro - müştərilərin tapşırığı, 112 592,1 min avro - valyuta mövqeyinin tənzimlənməsi, 42 812 min avro - mübadilə məntəqələri, 3 514,8 min avro - kreditlərin ödənilməsi, 984,8 min avro - digər banklara depozitlərin qaytarılması, 1 387 255,3 min avro isə s. məqsədlərlə aparılıb. Azərbaycanın ümumi daxili valyuta bazarında isə avronun payı 18,5%-ə düşüb, halbuki ötən ilin analoji dövründə bu göstərici 18,9%-ə bərabər olub. Bu göstəricilər avronun Azərbaycan iqtisadiyyatında müəyyən rola malik olduğunu əks etdirir. Qeyd edək ki, daxili valyuta bazarında avro üzrə əməliyyatlar əsasən avrozona ilə aparılan idxalla bağlıdır.

<span style="color:#FF0000;font-size:18px;">[b]Viktor Yuşşenko Yuliya Timoşenkonu yenidən Rusiya ilə gizli əlaqədə ittiham edib[b]</span>

[Kiyev - APA. Ukrayna prezidenti Viktor Yuşşenko Ali Radada demokratik çoxluğun bərpasına və onun milli maraqların reallaşdırılması istiqamətində fəaliyyət göstərəcəyinə ümid edir. APA-nın "UNİAN"a istinadən verdiyi məlumata görə, bunu prezident katibliyi rəhbərinin müavini Andrey Kislinski deyib. O bildirib ki, belə bir çoxluq son günlər danışıldığı kimi, "Yuliya Timoşenko", "Bizim Ukrayna-Xalq Özünümüdafiəsi" blokları və Litvinin bloku tərəfindən yaradıla bilər: "Ancaq bu cür ittifaq yalnız səmimi münasibətlər zəminində yaradılmalıdır və Ukrayna xaricindən idarə olunan ssenarilərə pərdə rolunu oynamamalıdır". A. Kislinski "Yuliya Timoşenko" bloku və Regionlar Partiyası arasında koalisiya formalaşdırılması və Ukraynada parlament respublikasının yaradılması cəhdlərinin, həmçinin baş nazirin rus kuratorlarla əlaqəsinin davam etdiyini söyləyib: "Rusiya siyasi dairələrinin nümayəndələri bu cür koalisiyanın yaradılmasını açıq-aşkar alqışlamaqla yanaşı, onun Avropada qəbul olunmasına zəmin də yaratmaq istədilər. Ancaq bu cəhdlər Avropada anlayışla qarşılanmadı. Üstəlik, "Yuliya Timoşenko" blokunun vətənpərvər üzvləri Timoşenkonun şəxsi ambisiyalarının reallaşması naminə Kremlyönümlü koalisiyanın formalaşdırılmasına qarşı çıxdılar".

<span style="color:#FF0000;font-size:18px;">[b]Moskvada Azərbaycan vətəndaşı vəhşicəsinə qətlə yetirilib[b]</span>

[Moskva-APA. Moskvada daha bir Azərbaycan vətəndaşı vəhşicəsinə qətlə yetirilib. APA-nın məlumatına görə, dünən axşam radələrində Zelenoqrad xəstəxanalarından birinə qarın və döş nahiyəsindən çoxsaylı kəsici-deşici yaralar almış 47 yaşlı Azərbaycan vətəndaşı gətirilib. İlkin müayinədən sonra həkimlər soydaşımıza həmçinin qapalı kəllə-beyin travması və baş beynin silkələnməsi diaqnozu qoyublar. Vəziyyəti ağır qiymətləndirilən soydaşımız xəstəxanaya gətirildikdən bir neçə saat sonra vəfat edib. İlkin məlumata görə, Azərbaycan vətəndaşını qətlə yetirən iki nəfərdir. Onların axtarışı davam edir.

<span style="color:#FF0000;font-size:18px;">[b]Bir ildir axtarışda olan oğru tutulub[b]</span>

[Bakı. Hafiz Heydərov-APA. Qaradağda axtarışda olan oğrun həbs edilib. Qaradağ rayon Polis İdarəsindən APA-ya verilən məlumata görə, 1964-cü il təvəllüdlü Məzahir Muxtar oğlu Məmmədov Bakı şəhərində ev qarət etməkdə təqsirli bilinir. Bir il əvvəl törətdiyi oğurluq əməlinə görə, onun barəsində Cinayət Məcəlləsinin 177-ci (oğurluq) maddəsi ilə axtarış elan olunub. M. Məmmədov Polis İdarəsinin 10-cu Polis Bölməsinin əməkdaşlarının keçirdiyi əməliyyat-axtarış tədbirləri nəticəsində paytaxtda saxlanılıb.