Azərbaycan Xəbərləri

<span style="color:#FF0000;font-size:18px;">[b]Bakı Şəhər Prokurorluğu baş redaktorun ölümü ilə bağlı açıqlama yayıb[b]</span>

Bakı-APA. Bakı Şəhər Prokurorluğu "Yeni Kapital" qəzetinin baş redaktoru Malik Rəfiyevin ölümü ilə bağlı açıqlama yayıb. Bakı Şəhər Prokurorluğundan APA-ya daxil olan açıqlamada bildirilir ki, 18 sentyabr 2008-ci il tarixdə saat 09.00-da Bakı şəhəri Zaynal Abdinov küçəsində - Azərbaycan Dövlət Dəmir Yolu İdarəsinin arxasında özünə məxsus avtomobildə 1957-ci il təvəllüdlü Rəfiyev Malik İnqilab oğlunun meyiti aşkarlanıb.

[Məlumat əsasında Nəsimi rayon Prokurorluğunun və Polis İdarəsinin əməkdaşları hadisə yerinə gedib, məhkəmə tibb ekspertizasının iştirakı ilə hadisə yerinə baxış keçirilib. Baxış zamanı M. Rəfiyevin meyiti "Mercedes-Benz E-230" markalı, 90 BE 952 dövlət nömrə nişanlı avtomobilin sürücü oturacağında, kəndirdən hazırlanmış ilgək vasitəsilə əl tutacağından asılı vəziyyətdə aşkarlanıb. Meyitin sol dirsək çuxurunda və hər iki saidin 1/3-nin ön səthində, sol əlin arxasında kəsik və cızıqlar, boynunun dərisində arxadan önə və bir qədər aşağıdan yuxarı doğru istiqamətdə yerləşmiş stranqulyasiya şırımı aşkar olunub. Maşından M. Rəfiyevə məxsus sənəd və əşyalarla yanaşı, üzərində "Mən xahiş edirəm ki, mənim ölümümdə heç kimi təqsirkar saymayın. Təqsirkar özüməm. Malik. 17.09.2008" yazısı olan kağız parçası və üzərində qana bənzər ləkələr olan ülgüc (lezva) aşkar edilərək götürülüb. Meyit daxili müayinə üçün Səhiyyə Nazirliyi Məhkəmə Tibb Ekspertizası və Patoloji Anatomiya Birliyinin Nəsimi rayon şöbəsinə göndərilib. Nəsimi rayon Prokurorluğunda 18.09.2008-ci il tarixdə M. Rəfiyevin intihar etməsi faktına görə Azərbaycan Respublikası Cinayət Məcəlləsinin 125-ci maddəsi (özünü öldürmə həddinə çatdırma) ilə dərhal cinayət işi başlanılıb və təxirəsalınmaz istintaq hərəkətləri həyata keçirilib. Məhkəmə Tibb Ekspertizası və Patoloji Anatomiya Birliyinin Nəsimi rayon şöbəsinin arayışına əsasən, M. Rəfiyevin meyitinin daxili müayinəsi zamanı asfiktik ölümün əlamətləri müəyyən edilib. Bundan əlavə, meyitin üzərindəki xəsarətlər M. Rəfiyevin özü tərəfindən yetirilmə xarakterlidir ki, bu da onun intihar etməsinə dəlalət edir. Meyitin üzərində qarşılıqlı mübarizə və özünü müdafiə üçün xarakterik olan əlamətlər aşkar edilməyib. Ədliyyə Nazirliyinin Məhkəmə Ekspertiza Mərkəzinin rəyinə əsasən, hadisə yerindən aşkarlanmış kağızdakı "Mən xahiş edirəm ki, mənim ölümümdə heç kimi təqsirkar saymayın. Təqsirkar özüməm. Malik. 17.09.2008" əlyazması da M. Rəfiyev tərəfindən icra olunub. Mətbuat Şurasının məktubuna əsasən isə M. Rəfiyevin baş redaktoru olduğu "Yeni kapital" qəzetinin nəşri və satışı ilə bağlı araşdırma aparılıb. Nəşriyyat və qəzet yayımı firmalarından bildirilib ki, bu adda qəzet onlar tərəfindən çap olunmayıb və yayılmayıb. Cinayət işinin istintaqı zamanı M. Rəfiyevin ölümünün onun peşə fəaliyyəti ilə bağlı olmadığı müəyyən edilib. Belə ki, M. Rəfiyev "Messenat Holding Şirkətlər Qrupu" MMC-nin mətbuat katibi işləməklə, həmin şirkətə məxsus mənzillərin alğı-satqısı ilə məşğul olub və bu fəaliyyəti ilə əlaqədar bir neçə şəxsə külli miqdarda borcu yaranıb. M. Rəfiyrv borclu olduğu şəxslərə həmin pulları qaytara bilməyib. Hazırda iş üzrə istintaq hərəkətləri davam etdirilir. İstintaqın nəticəsi barədə ictimaiyyətə məlumat veriləcək.

<span style="color:#FF0000;font-size:18px;">[b]İslamabadda dəhşətli terror aktı törədilib, ən azı 52 nəfər ölüb, 100-dən çox yaralı var[b]</span>

İslamabad - APA. Bu gün İslamabaddakı "Marriot" otelinin yaxınlığında baş verən partlayış nəticəsində ən azı 52 nəfər ölüb, yaralıların sayının isə 100-ü keçdiyi bildirilir. APA-nın SNN telekanalına istinadən verdiyi məlumata görə, ölənlərin sayının artacağı ehtimal olunur.

[Belə ki, otel binası alova büründüyündən xilasedicilər oraya yaxınlaşa bilmirlər. Oteldə insanların olduğu güman edilir. Yerli hüquq-mühafizə orqanları partlayışın terror aktı olduğunu bildirir. İslamabad polisinin məlumatına görə, otelin yaxınlığında tonlarla partlayıcı partladılıb. Fasadı partlayışın gücündən tamamilə dağılmış otelin uçmaq təhlükəsi yaranıb. Hücuma məruz qalmış otel hökumət binalarının və diplomatik missiyaların yaxınlığında yerləşir. İlkin məlumata görə, terror aktını avtomobili idarə edən kamikadze törədib. Digər məlumatlarda isə terrorçuların ABŞ Mərkəzi Kəşfiyyat İdarəsinin İslamabadda olan zabitlərini hədəfə aldıqları bildirilir. Lakin digər mənbələr bu xəbəri təsdiqləmirlər. Hələlik terror aktını heç bir təşkilat öz üzərinə götürməyib. Terror aktı Pakistan prezidenti Asif Əli Zərdarinin parlamentdəki çıxışından az sonra baş verib. Prezident parlamentdəki çıxışında terrorla mübarizəyə sadiq qalacağını bəyan edib.

<span style="color:#FF0000;font-size:18px;">[b]Çində baş verən partlayış 34 nəfərin ölümü ilə nəticələnib[b]</span>

Bakı-APA. Çində qaz mədənində partlayış baş verib. APA-nın xəbərinə görə, hadisə nəticəsində 37 nəfər ölüb.

[Çin Xəbər Agentliyi patlayışın ölkənin Hənan bölgəsində baş verməsi barədə xəbər yayıb. Partlayış baş verəndə mədəndə 108 nəfər olub. İşçilərdən 64-ü öz səyi nəticəsində, 7-i isə xilasedici dəstələr tərəfindən xilas edilə bilib.

<span style="color:#FF0000;font-size:18px;">[b]"Ergenekon"la bağlı həbs olunmuş generalın azad olunmasına qərar verilib, məşhur aktrisa və meneceri də sərbəst buraxılıb-YENİLƏNİB[b]</span>

İstanbul-APA. Türkiyədə Ergenekon əməliyyatı çərçivəsində həbs olunmuş istefada olan general, Atatürkçü Düşüncə Dərnəyinin başqanı Şener Əruyğurun azad olunmasına qərar verilib.

[APA-nın xəbərinə görə, qərar bu gün İstanbuldakı 9-cu Ağır Cəza Məhkəməsi tərəfindən çıxarılıb. Ş. Əruyğurun azadlığa buraxılması ilə bağlı qərarın onun səhhətində yaranmış ciddi problemlə bağlı olduğu bildirilib. Qeyd edək ki, Ergenekon əməliyyatı çərçivəsində bu il iyulun 6-da həbs olunaraq, Kocaelidəki həbsxanaya göndərilən general sentyabrın 17-də yüksək qan təzyiqi səbəbi ilə həbsxanasda pilləkənlərdən yıxılıb. Nəticədə onun boynu sınıb, beyninə qan sızıb. Hazırda Kocaeli xəstəxanasında reanimasiya şöbəsində komada olan generalın hələlik azad olunması ilə bağlı qərardan belə xəbəri yoxdur.Həkimləri onun səhhətində müəyyən irəliləyişlər olduğunu desələr də, hələlik həyati təhlükəsi keçməyib. Buna görə də məhkəmənin qərarından dərhal sonra Kocaeli Xəstəxanasının baş həkimi Nazım Mutlu generalın ailəsinin qərar verəcəyi təqdirdə onun başqa bir xəstəxanaya köçürülməsinin mümkün olduğunu söyləyib. Eyni əməliyyat çərçivəsində həbs olunmuş 5 hərbçi və bir hərbi məktəb tələbəsinin də bu gün məhkəməsi keçirilib. Onlardan biri məhkəmədə sərbəst buraxılsa da, digərləri haqqında həbs-qətimkan tədbiri seçilib. Ergenekon əməliyyatı ilə bağlı saxlanılan aktrisa Nursəli İdiz və menecer Seyhan Soylunun da daxil olduğu 13 nəfər də məhkəməyə göndərilib. İfadələri alınan N. İldiz, S. Soylu və daha üç nəfər sərbəst buraxılıblar, vəkil Levent Təmizin də daxil olduğu 8 nəfər barəsində isə həbs-qətimkan tədbiri seçilib.

<span style="color:#FF0000;font-size:18px;">[b]Azərbaycan prezidenti İslamabaddakı faciə ilə bağlı pakistanlı həmkarına başsağlığı verib[b]</span>

Bakı-APA. Azərbaycan prezidenti İlham Əliyev Pakistan prezidenti Asif Əli Zərdariyə İslamabadda çoxlu sayda insan təlafatı ilə nəticələnmiş partlayışla bağlı başsağlığı verib.

[APA-nın xəbərinə görə, başsağlığı mətnində İslamabadda törədilmiş terror aktı nəticəsində çoxsaylı insan tələfatı xəbərinin dərin kədər hissi ilə qarşılandığı vurğulanıb: " Biz bu hadisədən son dərəcə hiddətlənir, terrorizmin bütün təzahürlərini qətiyyətlə pisləyir, beynəlxalq birliyin bu dəhşətli bəlaya qarşı mübarizəsini hər cür dəstəkləyirik. Baş vermiş faciə ilə əlaqədar Sizə, həlak olanların ailələrinə və yaxın adamlarına, bütün Pakistan xalqına öz adımdan və Azərbaycan xalqı adından dərin hüznlə başsağlığı verir, yaralananların və xəsarət alanların tezliklə sağalmasını arzulayıram".

<span style="color:#FF0000;font-size:18px;">[b]Azərbaycanda hava nəqliyyatı ilə sərnişin daşımaları 11% azalıb[b]</span>

[Bakı. Nicat Mustafayev - APA-ECONOMICS. Bu ilin yanvar-avqust aylarında Azərbaycanda hava nəqliyyatı vasitəsilə 917,4 min və ya əvvəlki ilin müvafiq dövrünə nisbətən 10,7% az sərnişin daşınıb.Dövlət Statistika Komitəsindən «APA-ECONOMICS»ə verilən məlumata görə, hava nəqliyyatı növü ilə daşınmanın 93,1%-i dövlət bölməsi, 6,9%-i isə özəl müəssisələrə məxsus hava gəmiləri ilə həyata keçirilib.Qeyd edək ki, ümumilikdə bu ilin yanvar-avqust ayları ərzində Azərbaycanın nəqliyyat sektorunda yük daşınması 10,6%, yük dövriyyəsi isə 18,9% artıb. Hesabat dövründə özəl bölmənin nəqliyyat vasitələri ilə yük daşınması 13,5% artıb.

<span style="color:#FF0000;font-size:18px;">[b]Azərbaycan sakinlərinin hər biri yanvar-avqust aylarında orta hesabla 1280 dollarlıq mal alıb[b]</span>

[Bakı. Nicat Mustafayev - APA-ECONOMICS. Bu ilin yanvar-avqust aylarında Azərbaycanda ticarət və xidmət şəbəkəsində əhaliyə 8 808,9 mln. manatlıq və ya 2007-ci ilin eyni dövrü ilə müqayisədə 18,1% çox istehlak malları satılıb və pullu xidmət göstərilib. Dövlət Statistika Komitəsindən «APA-ECONOMICS»ə verilən məlumata görə, artımın 63,6%-i ticarət fəaliyyəti, 36,4%-i isə əhaliyə göstərilən pullu xidmətlərin hesabına təmin edilib. İstehlak bazarında pərakəndə əmtəə dövriyyəsinin və əhaliyə göstərilən pullu xidmətlərin xüsusi çəkiləri müvafiq olaraq 77% və 23% təşkil edib.Hesabat dövründə pərakəndə əmtəə dövriyyəsinin və əhaliyə göstərilən pullu xidmətlərin real artımının 90,7%-i özəl müəssisələrin fəaliyyəti hesabına təmin olunub. Bu ilin yanvar-avqust ayları ərzində ticarət və xidmət şəbəkələrindən hər bir ölkə sakini orta hesabla 1 041,1 manatlıq və ya əvvəlki ilin analoji dövründəkindən 306,1 manatlıq və ya 41,7% çox müxtəlif istehlak malları alıb və pullu xidmətlərdən istifadə edib.