Ramil Səfərov vətənə qayıdıb

[

Azərbaycanlı zabit Ramil Səfərov Bakıya gətirilib. Bu barədə ilk olaraq avropa.info saytı məlumat yayıb. Faktı, Macarıstanda həbsdə olan zabitimizin gətirilmə prosesindən xəbərdar olan iş adamı İlham Rəhimov da təsdiq edib. "Yeni Müsavat"a məlum olub ki, bu məsələ Azərbaycan prezidenti ilə Macarıstan prezidenti arasında son görüşdə birmənalı olaraq həllini tapıb. Xatırladırıq ki, qəzetimiz ölkə rəhbərliyinin belə bir xilas prosesi hazırladığı barədə dünənki sayında yazmışdı.

Artıq Facebook-da onun jurnalistlə şəkli də yayımlanıb. Az sonra Azərbaycan prezidenti Ramil Səfərovun əfv edilməsi ilə bağlı fərman da verib. İndi Ramil Səfərov tamamilə azadlıqdadır.

Ramil Səfərov 25 avqust 1977-ci ildə Cəbrayıl rayonunda dünyaya gəlib. 1991-ci ildə Cəmşid Naxçıvanski adına hərbi təmayüllü məktəbə daxil olub. 1992-ci ilin sentyabrında ARMN-in sərəncamı ilə təhsilini davam etdirmək üçün Türkiyənın İzmir şəhərinə göndərilib. Maltəpə hərbi litseyini müvəffəqiyyətlə bitirdikdən sonra Ankara Ali Hərbi məktəbinə daxil olub və hərbi təlim kursları keçib. 2001-ci ilin may ayından 2002-ci ilin mart ayına qədər MN-in sərəncamı ilə Gədəbəydəki "N" saylı hərbi hissədə tağım komandiri vəzifəsində qulluq edib. 2002-ci ilin mart ayında MN-in sərəncamı ilə H.Əliyev adına AHKM-ə göndərilib. Qulluq etdiyi müddətdə baş leytenant rütbəsinə qədər yüksəlib. 2004-cü ilin yanvar ayında MN-in sərəncamı ilə NATO proqramları çərçivəsində Macarıstanın Budapeşt şəhərində keçirilən 3 aylıq ingilis dili kurslarına ezam olunub.

Vətənə dönməyə 20 gün qalmış – fevral ayının 19-da kurslarda iştirak edən Qurqen Markaryan adlı erməni zabitini qətlə yetirib. Qurgen Azərbaycan bayrağını Ramilin gözü qarşısında təhqir edərək, onu belə bir hərəkət etməyə sövq edib. Elə həmin tarixdə Budapeştin hüquq-mühafizə orqanları tərəfindən həbs olunub. Budapeşt Şəhər Məhkəməsinin 13 aprel 2006-cı il tarixli hökmü ilə ömürlük azadlıqdan məhrum edilib.