Nömrələrin köçürülməsi xidmətlərinin tətbiqi gözlənilir

Rabitə və İnformasiya Texnologiyaları Nazirliyi yaxın günlərdə müvafiq strukturlara nömrələrin köçürülməsi xidmətlərinin tətbiqi qaydalarının son variantını təsdiq olunmaq üçün təqdim edəcək. Bunu rabitə və informasiya texnologiyaları nazirinin müavini İltimas Məmmədov söyləyib. Onun sözlərinə görə, hüquqi bazanın yaradılmasından sonra, bu xidmətin yayılması barədə yekun qərar qəbul ediləcək. “Hazırda əsas məsələ nömrələrin köçürülməsi xidmətinin tətbiqi məsələsini nizamlayan hüquqi baza və xüsusi qaydaların olmasıdır. Bu məsələ operatorlarla ətraflı müzakirə olunub. Güman edirəm, operator şəbəkələrində bu xidmətin tətbiqi ilin sonuna qədər həyata keçəcək”, - deyə İ. Məmmədov deyib. Nazir müavini sözlərinə onu da əlavə edib ki, xidmətin tətbiq olunması bilavasitə operatorların maraqlarına toxunacaq, nəticə isə istifadəçilər üçün əlverişli olacaq.

Zaman