Yaşat məni...

Nəyi düşünürsən,de nəyi indi?
Axı, bu sevgidə günahkar kimdi?
Mənəmsə,cəzamı çəkmişəm daha,
O köhnə xatirəm susmadı, dindi.
İndi tək qalmışam məni təkləmə
İtirib sevinci, qəm aldım baha.
Bütün günahları mənə yükləmə
Onsuz da bu dünyada
neçə-neçə səbəbsiz,
günahını duymadan
min bir əzab çəkən var.
Dərd əlindən qəddini,
cavan ikən bükən var.
Vədəsiz bu həyatla,vidalaşıb köçən var
İndi gəl açıq danış, axı kimdi günahkar.
Yaxşı, mənəm səninçün bağışlanmaz
günahlı, suçlu, sevgisiz insan.
Onda qaytar bir zaman
səni mələk sandığım,
Eşqinə inandığım, sənə əmanət kimi
verdiyim səadəti, o eşqi, məhəbbəti
Qaytar sonsuz, tükənməz ümüdlü arzuları.
Öz eşqindən dönməyən əyilməyən vüqarı.
Qaytar mənim gözümdə hələ də heç solmayan
ətirli,gül-çiçəkli ilk yazı, ilk baharı.
Qaytar mənim o çılğın, coşqulu gəncliyimi
BU həyatla çarpışan, vuruşan sərtliyimi
Qaytar mənim mən adlı səndəki mənliyimi
Qaytar sənlə yaşanan firəvan dincliyimi
Qaytar fani dünyada , səni səndən ziyada
sevən ürəyi qaytar.
Qaytar o Ulu Tanrı insana bəxş etdiyi
o müqəddəs duyuğumu
sevgi adlı pərimi
nazlı mələyi qaytar.
Yox, qaytar bilməsən
Onda məni dinlə,sən
Ya gözümə görünmə
uğrama yollarıma.
Hey sürünə-sürünə gələn xəyallarıma
Sevmirsənsə,qəlbindən
biryolluq boşalt məni.
Mən sənin ürəyində
bir qara ləkəyəmsə,
razıyam, sil at məni.
Ya da unut hər seyi,
gec də olsa qayıt gəl
Sənsiz qalan ömrümə.
Mübarək qədəminlə,Qayıt!
Qayıt,yenə gəl!
Sən əbədi mənə gəl
Olaq bir mən,bir də sən,
Sevərək yaşat məni!