Dənizin nəgməsi

[
Bəli, dəniz həmişə hərəkətdədir, o da yaşayır, nəfəs alır, danışır, hətta oxuyur da.
Siz dənizin nəğmasini yaxından, lap yaxından dinləmisinizmi?
Vaxt tapan kimi sahilə gedin, lap səhər tezdən, ya da axşam çağı. Elə bir gün seçinki ağacların yarpaqları belə tərpənməsin, dənizin ənginliyi üzərində xoş bir sükut hökm sürsün. Narahat olmayın, elə düşünməyin ki, belə sakit gündə dənizin nəğməsini eşitmək olmasın. Ən dərin sükut belə suların səsini susdura bilməsin.

Ləpədöyəndəki xırda qayaların üsdündə kiçik bir meydança tapıb əyləşin. Gözləriniz qarşısında fikrinizə, xəyallarınıza, ruhunuza zərif bir dinclik, xoş bir istirahət gətirən bir lövhə açılacaq. Sakitlikdir…
Dəniz o qədər sakitdir ki, elə bir yaranmışdan belədir, heç vaxt dalğalanmayıb. Yalnız ayaqlarınızın az qala suya toxunduğu yerdə, daşların arasında incə ləpələr səslənir.

Nə qədər yorğun, nə qədər əsəbi olsanız belə hətta canınızda xəstəlik əlaməti duysanız belə bu səslərdən şəfa tapacaqsınız. Dəqiqələr, saatlar ötdükcə düşünəcəksiniz ki, bu ləpələrin şırıltısı deyil, göz işlədikcə ətrafa sərilən ucu-bucağı görünməyən dənizin nəğməsidir. Onun təranəsi şirin, şirin olduğu qədər də dərindir. Ona görə ki, bu nəğmə dənizin dərinliklərindən gəlir...
Bu dənizin nəğməsidir….