Əli Hacı

ƏLİ HACI






Durum gedim
Döyməyə qapı qalmadı
Ürək açmağa adam.
Bizi sabahlara ötürən
Gedənlər də gəlmədi!
Durum gedim!

Hər gecə səhərin xəstəsi
Könlüm sabahlardan da bezir
Hər gün
Gəzdiyim yollarımda
Tənhalığım gəzir.
Gəzdiyim yollarım
Əl üzdüyüm yollarım
Durum gedim!

Buluda bax! İlahi!...
Əlləri göydən üzülüb
Yer də götürə bilmir.
Mən çoxdan ölmüşün
Yanına adamlar yığılıb
Yerdən götürə bilmir,
Durum gedim!
***

















Sən və mən
Sən dəniz
Mən çay olmuşam,
Gəlib sənə qovuşmağa.
Sən torpaq,
Mənsə göy olmuşam,
Bulud-bulud ağlamağa.

Sən sevinc,
Mənsə kədər
Kimi gəlmişəm,
Qoynunda yer almağa.

Sən olum,
Mən ölüm,
Gəlmişəm sən olmağa.

***























Yazıma bu axşam qış qarı düşüb
Payızda qonubdu çiçəyim üstə.
Mənim sabahıma axşamlar düşüb
Qəmə yurd salıbdı ürəyim üstə.

Gözümdə şəkli var dumanın, çənin
Axan göz yaşım da bulanıq gəlir.
Rəngi qanımdandı saralan gülün
Ruhuma bu dünya qaranlıq gəlir.

Qollarım meşə budandığından
Ayağım yorulub yol yeriməkdən.
Bezmişəm adam tək yaşadığımdan
Bezmişəm şaman tək söz ələməkdən.

Sabahım axşamdı fəsillərində
Dünyadan nə sevinc,nə gülüş istə.
Bir sınıq güzgüyəm yar əllərində
Bir ağır dünya var qollarım üstə.

***













Daha gül qoxusu gəlmir havadan
Gül qoxusu verən şerlər yazım.
Yoxdu dərdlərimdən məni oyadan
Durub bağça gəzim, bir çiçək üzüm.

Daha gül qoxusu yox yaşamaqda
Dəyişmir nə gecə, nə də gündüzü.
Böyük günah varmış adam olmaqda
Adam tək sevmədik bir-birimizi.

Silərək adımı varaqlarından
Bu yer kitabından getmək istədim.
Hamını çox sevdim mən öz yerimə
Hamının yerinə ölmək istədim.

***


























Bu gün çağır hamını
Boynu bükük sevgiləri
Yaşatmağa.
Hamının
Şərab doldur canına.
Sonra
Tanrıdan başqa yoxluğuna
Inandır hamını.

***



























Sən ah çəkdin
Mən üşüdüm.
Çəkdiyim aha gurladım
Üşüdüm –ayrılığa
Ağladım-tənhalığa.
Sənin ayaqlarının
Altı torpaqdı deyə
Özümü verdim
Ölüm adlı varlığa.

***
































Başqa sevgim qalmadı
Verdim olanı yemisən.
Mən doğru bilib verdim,
Sənsə yalanı yemisən.

Soyutmağa verməmişəm
Qaytar elə isti onu.
Yaz ürəkdən sevməmişəm,
Qaytaranda üstün onun.

***


























Yoruldum bu sevdadan
Istəyin həsrət yoludur.
Çıxıb təkliyə gedirəm
Yanın adamla doludur.

Burax məni tənhalığa
Torpaq ol, bulud ağlayım.
Bir yer saxla ayrılığa,
Ayrılığı yurd saxlayım.

***



























Çıxart vaxtımın içindən
O zəhrimar soyuqluğunu.
Çıx vaxtının
Mənsiz üşüyən qırağına
Güzgü tut üzünə günahlarının!
Səma da təmiz olmur,
Hər vaxtın içində
Kor Ərəbin mahnısına
Qovrulan tək qovrulursan,
Saralmış bəxtinin içində!...
***





























Sən qoyma
Sən qoyma uzağa gedəm
Tanrım gözündən o yana
Özündən aşağı yer ver,
Qoyma özündən o yana.

Gəlişimdə yol azmışam,
Geriyə yolu azmışam.
Ölmüşəm yolu bu axşam,
Dirilim gedim hayana!...

Durub baxmadım arxama,
Kədər yapışdı yaxama.
Bu həyat bir qumarxana
Mən də qoşuldum oyuna.



Dünyanı küyə gəzirəm
Doyub ərköyün gəzirəm.
Ölümün toyun gəzirəm,
Özümü verim toyuna.

Sən qoyma uzağa gedəm
Tanrım,gözündən o yana.
Özündən aşağı yer ver,
Qoyma özündən o yana.

***











Sənsizliyin içindən çıxıb
Ay işığına tutdum üzümü.
Xeyirlə şərin qarışığına
Göz yaşımla yuyurdum
Üzümü.
Sakit havanın ağzına
Çəkdiyim ah-
Isti nəfəsim dolurdu.
Didərgin baxışlarıma,
Sürgündəki sevgimə
Bu gecə
Adamlığımı yonurdum!...

***



























Tənhalığım-boyuma bicilən kəfən
Ayrılıq-məni öldürən qatil.
Tanrım gün gətir ,
Öz gözlərin baxan günü gətir
əvvəlin sonuna,
sonun əvvəlinə.

Nə qız baxışıdı bu gün
Nə ərli qadının
Qadınlıq üzü,
Nə qadina baxan ər gözü.
Gecədən şeh qonan
Qaranlıq gecədi gündüzün.


Kəfənim-tənhalıq
Qatilim-ayrılıq
Nə yaxşı hələ tanrı
Birdə göy üzü var
Göy üzünə ayrılırıq!
Tanrım !
Göy üzünə ayrılırıq.
əli hacı
















qarım yağdı,qar üstünə
ürəyimin geniş,
bu dünyanın dar üstünə.
Şəkər sözüm acılaşdı,
Dedim bacıdı,qardaşdı
Məndən əvvəl qocalmışdı
Məndən sonra ölən dərdim.
Ruzgarların özüdür
Dünyadakı sonsuz ahım.
Yerdə daş gözlüdür,
Göydə,göy gözlüdür Allahım!
Buda mənəm,İlahi!


Mən öldürdüm,
Kor elədim
Özgə üzə,özgə gözə
Baxa-baxa baxışımı.
Həm səhəri,həm axşamı
Dərdi yedim üzü göyə
Buda mənəm,İlahi!

Bu axşam,ay işığına
Baş dasımı yondu misram.
Göyün birinçi mərtəbəsində.
Dua oxuyurdum Tanrıya
Ruzgarların səsində.
Adamlığdan qacırdım
Bir cicəyin əlləriylə bu axşam,
Ölümə əl acırdım.
Buqa mənəm,İlahi!

Tövbələr qapısından uzaq
Göy üzünə oxşayan
Üzümün
Ayparadı qaşları.
Hər gün
Suladığım üzümdə
Şoranlıq qırışları!
Hər gün sərxoşdu sözlərim,
Küləklər qabağında
Yüngüllükdən oynayan
Qum dənələri kimi!
Buda Tanrımın hökmü,
Büda mənəm, İlahi!
Əli Hacı



































Sən dərd, mən də ağ kəfən
Büküm özümə səni.
Gözlərim içində gör,
Qoyum yerimə səni.

Bu yolu qoşa gedək,
Yaş, quru yolun üstdən.
Gəl sən içimdə can ver,
Mən də qolların üstdə.

Baş altım daşdı, daş
Yarpaqlar yorğan mənə.
Qoşul gedək, yerim yaş,
Daş, yarpaq qurban sənə.

***


























Sən dur toyuna tələs
Mən də durum ölməyə.
Sən gəldin dərd verəsən,
Mən də dərd öldürməyə.

Toyunun xərci olsun
Göndərim döz daşımı.
Su əvəzi dalınca,
Səpim bu göz yaşımı.

Havasızda oynayan
əllərini sal yana.
Göylər mənimdi, dayan,
Ah çəksəm külün yanar.

***






















Gedək ruhum, tək-tənha
Mənə iman da dindir.
Döydüm qapısı bağlı
Dünya yas yerindədir.

Qaç cütdüyüm birə qaç,
Dərd səni güldürər qaç.
Nə qapı var, nə baca
Ölümdə sirr birdədir.

Olub gedən var-yoxum,
Olmaq deyil bu qorxum.
Axirətdəki qoxum
Dünyanın üzündədir.

Haqqa gələn, haqq gəlir,
Şərabımız ağ gəlir.
Yersiz bir sağlıq gəlir,
Dindən çıxan dindədir.

Gedək ruhum, tək- tənha
Mənə iman da dindir.
Döydüm qapısı bağlı
Dünya yas yerindədir.

***













Göy buludsuz, yer də quru
Yağış hayana yağır?!
Tanrı gözünü açıb
Onu duyana yağır.

Yeddi qurşaq altına,
Torpağın üz qatına,
Ozanın söz qatına
Ruhuna, cana yağır.

Ölçüsü üçdü deyə,
Güneyi döşdü deyə,
Bu dünya boşdu deyə
Yollu imana yağır.

Bir sonsuzdu,bir çəki
Ağ üzün içindəki
Zamanın içindəki
Gizli məkana yağır.

***



















Çıx get,sən Allah çıx get
Çaylar dənizə qovuşan təki
qovuşa bilmədik.
Çıx get!
Duman dərələrdə itən təki
Çıx get!
Bölüb verirdim sənə
olan sevgimi tikə-tikə
Ac xəyallarımdan keçirdi
Sən də yeyəsən bəlkə…
Çıx get!
Bulanıq suları axan sulara buraxdım .
Indi
Tanrıdan başqa kimsəyə yox vaxtım-
Çıx get…!

***























Dost dalınca dua
Çıx kölgəsindən sevginin
acıların yerinə ağzına su al
səni savabа götürməyən
düz yolların yerinə
daş altındakı ilan tək
yemini gözlə
bir az da yuvanı əzizlə
olanların yerinə.
Şaxta vurmuş budaqlar-
heysiz qolların,
fərsiz adamlar-
ac qarnın kimidi
özünə özün ağla
qalanların yerinə,
adamların yerinə

***






















Yaşamaq da bir dərddi
Çək dərdini, çək gedək,
Burax dünyanı ONA,
Qoşul mənə,tək gedək.

Tərəzi el gözüdə,
Yeməyin el gözündə,
İyi alıb yarpızdan
Havada ölək gedək…

Yükü vuraq dəvəyə,
Daş torpağa,su göyə…
Nağıl olub nəvəyə
Gəl biz də bitək gedək.

Göz-ada,qaş-aypara
Duamız tənhalara…
Su verib səhralara
Ölümü sevək gedək.

Yaşamaq da bir dərddi
Çək dərdini, çək gedək,
Burax dünyanı ONA,
Qoşul mənə,tək gedək.

***














Sevirik təkliyi bir ola-ola
hər gün tənhayıq
hər gün görüşmək arzusundayıq,
budaqlar yarpağa,
yağışlar torpağa həsrət təki.
Çoxdan qovuşmuşuq taleyimizlə
Qovuşa bilmirik təkliyimizlə.
Bu da bir gözəllik
gündə bir yerdəyik
ancaq tənhayıq,təkik.
Elə belə
gözlə hər gün məni,
mənim dərdim sənin bəxt üzüyündü
sal ürəyinə tanıyım səni…

***

























Daşam hörün divara,
Hörən daşsız qalmasın.
Bu üzündən dünyanın
Yerim yersiz qalmasın.

Özümə çatmır əlim,
Uzağa çatır əlim.
Kül altında közərim
Ocaq közsüz qalmasın.

Üstünə günahların
Göylər yağsın ağlasın,
Ağ yerə üzüm qarasın
Yaxın, rəngsiz qalmasın.

Dünyanı bu üzünə
Sevək, daş su üzünə,
Çevirək o üzünə,
Astar üzsüz qalmasın

Serleriniz xosuma geldi hamisini oxudum.Amma o qeder gunahlarimiz varki,ne qeder yagis yagsa bele yuyub apara bilmez :cry: