Gəncliyimizin qədrini bilirikmi ?

z. Ömərin xəlifəlik illəri idi. Bir gün xəlifə bir nəfəri yanına çağırıb ona belə deyir: “Səndən bir xahişim var! Hər gün mənim yanıma gəl və mənə “Sən də öləcəksən, ey Ömər!” - de”.

Bir müddət belə davam edir. Bir gün gəlir və Hz. Ömər həmin adamdan daha gəlməməsini xahiş edir. Adam bunun səbəbini soruşur. Xəlifə ona belə cavab verir: “Bu səhər güzgünün qarşısına keçdim. Saç-saqqalıma dən düşdüyünü gördüm. Düşündüm ki, onlar öz vəzifələrini səndən də yaxşı yerinə yetirirlər”.

Bəli, əziz dostlarım! Aynalar, güzgülər bizi gözləyir. Onların qarşısında duraq, nəyə qərar verəcəyimizi düşünək. Şair gözəl deyib:

Allahım! Bu qırışmış, solmuş üz mənimdirmi?

Heç çuxura düşmüş, bozarmış gözlərimi demirəm,

Ey aynalar! İllərdir ki, dost bildiyim aynalar!

Mənə qarşı bu düşmənçiliyinizin səbəbi nədir axı?!

Elə bu vaxt “Əsil dost hər zaman doğrunu söyləyər” ifadəsi gəldi ağlıma. Nə edək? Məncə, günah aynalarda deyil. Onlar bizim bədənimizə heç bir şey əlavə etmirlər. Necəyiksə, bizi elə də əks etdirirlər...

Bir də düşünürəm ki, ilin dörd fəsli də bahar deyil axı... Hər şey kimi gözəlliklər də solacaq... Hər şeyin bir sabahı, bir axşamı var... Şair Cənani gözəl deyib: “Dəhrdə bir gün görmədik ki, axşamsız olsun”.

Əslində axşamın olacağını, qaça bilmədiyimiz o saatın gələcəyini hamımız bilirik. Ancaq yenə də fani, faydasız şeylərə bağlanır, özümüzü aldadaraq, zenmizi başqa şeylərlə məşğul etməyə çalışırıq. Biz, dayanmadan dəyişən və bu dəyişiklər qarşısında kövrələn insanlar kimi bəzən hər şeyi unuduruq. J.J Russonun təbirincə desək: “Yer üzündə hər şey davamlı olaraq bir axın halındadır. Heç bir şey mütləq olaraq sabit və eyni şəkildə qalmır. Ətrafımızdakılara qarşı duyduğumuz sevgi də istər-istəməz keçib gedir, dəyişir”.
Aludə olduğu və zərərlərini bildiyi halda əlindəki siqareti kötüyünə qədər çəkən bir insan, çox təəssüf ki, eyni həssasiyyəti sayılı nəfəslərdən hörülən gəncliyinə qarşı göstərmir. Yəqin ki, pulla almadığımıza görə, gəncliyimizi qədrini bilmirik. Halbuki, həyatda insanın başına bir dəfə gələn gəncliyin nə olduğu, insanın əlindən gedəndən sonra bilinir.

İndi isə günümüzün gəncliyinə belə bir resept təqdim edirəm. Onu diqqətlə oxuyun: “Gənclik damarı ağıldan çox hisslərə əsaslanır. Hiss və həvəs isə kordur. Aqibətin necə olacağına fikir verməz. Bir dirhəm hazır ləzzəti, irəlidə ona təqdim olunacaq bir batman ləzzətə qurban verər”.

Buna əhəmiyyət verməməyimiz gələcəkdə düçar olacağımız xəstəlik və problemlərimizin müalicəsində bizə əngəl ola bilər. Bəli, bu gün, məhz bu gün uğrunda “əbədilik” andı içilmiş necə sevgilər və sevgililər vardır ki, qısa müddətdən sonra sönüb yoxa çıxmışlar.

Unutmayın, gənc dostlar! Həqiqi zövq və ağrı-acısız ləzzət yalnız imanla reallaşır. Bu haqda peyğəmbərimizin (s) dilindən belə bir hədis rəvayət olunur: “Gənclərin ən xeyirlisi təmkində və əxlaqsızlıqdan uzaq durmaqda yaşlı insanlara bənzəyənidir”.
Unutmayaq ki, hər şey kimi gənclik sərmayəsi də sərf edildiyi yerə görə, qiymət qazanacaq. Çox qısa müddət ərzində qonağımız olan gənclik neməti qiymətini bildiyimiz təqdirdə, bizə gələcəkdə əbədi gənclik bəxş edəcək. İndi isə gəlin bir az düşünək:


“Həqiqətən, gəncliyimizin qədrini bilirikmi?”