Sevgi - kainatın mayası

Insan sevgi ilə yaşayır, başqalarını da sevgi ilə yaşadır; insan sevgi sayəsində xoşbəxt olur, ətrafındakıları da sevgi ilə xoşbəxt edir.
Sevgi insanlığın canıdır, biz bir-birimizi sevgi ilə hiss edirik, onunla bir-birimizi duyuruq. Allah insanları bir-birinə bağlamaq üçün sevgidən daha böyük vasitə yaratmayıb. Əslində dünya köhnə bir xarabalıqdan ibarətdir. Onu yeniləşdirən, təravətləndirən sevgidir.
İnsanların sultanları var, qarışqaların və arıların kraliçaları var. Bu sultan və kraliçaların isə taxtları var. Onlar müəyyən bir üsulla seçilirlər və taxtlarına otururlar. Bizim könlümüzün də sultanı var ki, o da sevgidir. Sevgi könlümüzdə taxt qurub.
Sevginin otağı könüllərdir. Könüllər sevgi sayəsində müəyyən dəyər ifadə edir. Önünə sevgi bayrağı sancılmış qalalar qansız-qadasız fəth olunur. Sevgi əsgərlərinin ələ keçirə bilməyəcəyi qala yoxdur.
Min cür pisliklərlə əhatə olunmuş, kirlənmiş bu dünyada hər zaman təmizliyini, paklığını və saflığını qoruyan, gözəllik və cazibəsindən heç nə itirməmiş bir qüvvə varsa, o da sevgidir. Dünyada heç bir millət və toplumda ondan daha real bir şey yoxdur. Sevginin səsi digər bütün səsləri kölgədə qoyur, ən gözəl mahnılar belə sevginin səsinin gəldiyi yerdə susur.
Kainatın mayası sevgidir. Haqqın yaratmaq sevgisi olmasaydı, nə ay, nə günəş, nə ulduzlar, nə dağ, nə çay, nə dərə olmazdı. Kainat bir sevgi dağarcığıdır. Təbiət kitabında və ekosistemdə sevginin nəfəsi duyulmaqdadır. İnsanlar arasındakı münasibətlərdə də sevginin işartıları görünməkdədir.
Dünyada qiymətdən düşməyən bir dəyər varsa, o da sevgidir. Sevgi ən saf qızılla belə tərəziyə qoyulsa, yenə sevgi ağır gələr. Qızıl da, gümüş də, ən bahalı zinət əşyası da hər hansı inflyasiyadan təsirlənə bilər, ancaq heç bir dalğalanma sevgini ləpələri arasına ala bilməz.
Sevginin qapıları hər cür mənfi xislətlərə qapalıdır, heç bir xarici müdaxilə onun ahəngini poza bilməz.
Dünyada heç bir var-dövlət sevgiyə qalib gələ bilməz. Sevginin aça bilməyəcəyi heç bir qapı yoxdur. Sevginin toplandığı könül sahibləri isə məhəbbət fədailəridir.
Var-dövlət sahiblərinin sərmayələri bir gün yoxa çıxa bilər, ancaq məhəbbət fədailərinin sevgiləri heç vaxt tükənməz. Onların lüğətində kin, nifrət və qərəz yoxdur. Onlar ölümləri bahasına belə olsa, əsla düşmənçilik etməzlər.
İndiyə qədər şeytanın ən təhlükəli oyunlarını belə pozan bir qüvvə varsa, o da sevgidir. Peyğəmbərlər ən əzazil padşahlara belə sevgi ilə qalib gəliblər, onların kinlərini sevgi ilə söndürüblər.
Sevgi silahına sarılan bir insanın başqa silaha ehtiyacı yoxdur. Bəli, sevgi atom bombasından belə təsirli “silah”dır. Onun gülləsi güldür, xoşgörüdür, mərhəmətdir.
Sevginin olmadığı yerdə kin var, nifrət var, xaos var, müharibə var, qan var... Bu gün dünya bunlardan əziyyət çəkirsə, bunun yeganə səbəbi könüllərin sevgidən məhrum olmasıdır. Dünyada hər kəsin, hər şeyin sevgiyə ehtiyacı var. Nə özümüzü, nə də başqalarını sevgidən məhrum etməyək...