Dehlidən inəkləri qovacaqlar

[

Dehli hakimiyyət orqanları paytaxtın küçələrindən minlərlə inəyin qovulması planını Hindistan Ali Məhkəməsinə təqdim ediblər.

Paytaxt hakimiyyət orqanlarının hesablamalarına görə, Dehlidə 28 min inəyin olduğu 2300-dək qeyri-leqal süd ferması fəaliyyət göstərir. Əhalinin əksər hissəsi inəyə sitayiş etdiyindən heyvan sahibləri arxayınlıqla onları şəhərə buraxırlar. İnəklər küçələrin hərəkət hissələrində istirahət edir və nəticədə “tıxaclar” əmələ gətirirlər.
Dehlinin yaxınlığında nəhəng bir ferma təşkil edib inək sahiblərini buradan torpaq almağa məcbur etmək təklif edilir. Bütün inəklər fermaya aparıldıqdan sonra bu fermadan kənarda iş görən südçüləri cərimələyəcəklər.
Dehli hakimiyyət orqanları şəhərə “sivil” görkəm vermək üçün bir sıra tədbirlər görüblər. Məsələn, hazırda Dehli küçələrində fil görmək mümkün deyil. Onları şəhərə gətirmək üçün bir neçə yerdən icazə almaq lazımdır. Həmçinin Hindistanda geniş yayılmış köşklərdə yemək satışı da dayandırılıb.
Kəsilməsi qadağan olunmuş inəkləri Dehlidən qovmaq cəhdləri hinduist fəallarının ciddi etirazına səbəb olub. Tənqidçilər bu planın da əvvəlkilər kimi işləməyəcəyinə əmindirlər. Bundan əvvəl də sahibsiz inəklərin qulaqlarına birka vururdular, lakin sahibləri bunları kəsib atırdılar.
2005-ci ildə hər tutulmuş sahibsiz inəyə görə təqribən 23 funt sterlinq mükafat vəd olunmuşdu. Bu tədbir ona gətirib çıxarmışdı ki, sahibləri öz inəklərini təhvil verib mükafat alır, sonra isə inəkləri geri tələb edirdilər. 2006-cı ildə tutulmuş heyvanın boğazına mikroçiplər yerləşdirməyə başlamışdılar. Güman edilirdi ki, təzə tapılmış inəyin qarnına toxunmaqla heyvanın nömrəsini və sahibinin adını müəyyənləşdirmək mümkün olacaq. Sonradan bu tədbirdən də imtina edilmişdi.

Zaman Azərbaycan