Cabir Novruz - Bapbalaca bir gəlinsən

Cabir Novruz - Bapbalaca bir gəlinsən

Gəlişinlə lal sükutu uçurtdun,
Bizi çılğın bir aləmə köçürtdün,
Dağlar boyda dərdimizi kiçiltdin,
Evimizin səhər banı - Səfurəm
Mehribanlar mehribanı - Səfurəm...

Xırda boyun, gözün, əlin mübarək,
Çeşid-çeşid əskilərin mübarək,
Evimizə beşik gəlib mübarək,
Həsrət idik çoxdan ona - Səfurəm,
Nisgilimiz çatdı sona - Səfurəm...

Mışıl-mışıl uyuyanda bələkdə,
Gözləyirik səni əsən küləkdən,
Ağlayırsan sevinirik ürəkdən,
Sən güləndə gülüşürük - Səfurəm,
Bəxtimizə gör kim düşüb - Səfurəm...

Nənə deyir: - çox baxmayın balama,
Nəzər dəyər mənim ciyərparama,
Göz muncuğu bağlayıbdır qoluna
Gözümüzün işığısan - Səfurəm,
Bu evin qız uşağısan - Səfurəm...

Təzə doğan ayparasan, aypara,
Yüngül olsun qədəmlərin, ay bala,
Qardaş-bacın düzülsünlər qol-qola,
Ocağımız aşıb-daşsın - Səfurəm,
Böyük adlı, kiçik yaşlı - Səfurəm...

Bizim üçün səndən dadlı gözəl yox,
Xislətində nə bir ləkə, nə şər yox,
Bu dünyada səndən təmiz bəhər yox,
Müqəddəslik heykəlisən - Səfurəm,
Bapbalaca bir gəlinsən - Səfurəm...

1996.

Bizim üçün səndən dadlı gözəl yox,
Xislətində nə bir ləkə, nə şər yox,
Bu dünyada səndən təmiz bəhər yox,


tesekkurler :alqis: ::yerivar::