Ernesto Çe Gevara

Ernesto Çe Gevara 14 iyun 1928-ci ildə Rosarioda, Argentinada dünyaya gəlib. Ali təhsilini tibb ixtisası üzrə başa vurduqdan sonra, 1952-1953-cü illərdə gəmidə həkim işləyərək Latın Amerikasının bir çox ölkəsini gəzir. Qvatemalada birinci həyat yoldaşı olacaq inqilabçı İlda Qadea ilə tanış olur. Onun təsiri nəticəsində Ernesto da marksizmə yoluxur. 1954-cü ildə ailəsi ilə birgə Meksikaya köçüb həkim işləyir. Bir il sonra artıq radikal marksist olan Gevara, Fidel Kastro ilə tanış olub, onun inqilabçı "M-26-7" dəstəsinə qoşulur və bu zaman özünün məşhur olacaq "Çe" (ispancadan tərcümədə "hey!" ) ləqəbini alır. 1956-da "Qranma"-da Kubaya ayaq basan 82 inqilabçıdan biri olur. 2 il hərbi əməliyyatlarda iştirak edir, 2 dəfə yaralanır. 1959-da Çenin dəstəsi Havanaya daxil olur və müharibə qurtarır. Bu vaxt artıq o bütün dünyada məşhur idi. Bir müddət La Kabana həbsxanasının müdiri vəzifəsində çalışır. Onun əmri ilə minlərlə əksinqilabçı güllələnir. Onların bir çoxunun güllələnməsində Çe özü iştirak edir. Bunun ardınca o, bir çox ölkələrə rəsmi səfərə yol düşür. Yenə həmin ildə Kuba Milli Bankının prezidenti vəzifəsinə təyin olunur. SSRİ və digər sosialist ölkələrinə səfərlər edir. 1961-ci ildə sənaye naziri təyin olunur. 1965-də Afrika ölkələrinə səfəri zamanı SSRİ-in ünvanına kəskin ittihamlar səsləndirdikdən sonra Fidel Kastro ilə münasibətləri tamamilə pozulur. Kubaya qayıtdıqdan sonra ailəsi, dostları və F.Kastroya son məktub ünvanlayır. Məktubda bütün vəzifələrindən və Kuba vətəndaşlığından imtina etdiyini bildirir.
1966-ci ildə bir qrup inqilabçı ilə Konqoda Patris Lumumba tərəfdarlarının hazırlanması ilə məşğul olur. Lakin, bu plan uğursuzluqla nəticlərnir - üsyançılar məğlub olurlar. Həmin ilin noyabrında Boliviyaya gələrək Boliviya Milli Azadlıq Ordusunda vuruşur. Uğursuzluqlar bir-birini əvəzləyir və 1967-ci ilin oktyabrında La İquera kəndi yaxınlığında ağır yaralanmış Çe əsir düşür. Oktyabrın 9-u əfsanəvi inqilabçı güllələnir. Əlləri kəsilərək Vaşinqtona göndərilir. Cəsəsdi isə adsız məzarlıqda dəfn edilir. 1997-ci ildə isə cəsəd Boliviyadan Kubanın Santa-Klara şəhərinə köçürülür və Çeyə 4 metr hündürlüyündə abidə qoyulur.