Qadın və avtomobil

Hələ bir neçə illər öncə xanımları avtomobilin sükanı arxasında görəndə çoxları təəccüblənsə də, indi bu adi hal alıb.
Hətta müasir dövrdə xanımlar əks cinsin nümayəndələrindən daha səliqəli, daha yaxşı maşını idarə etdikləri üçün təriflər də eşidirlər. Xanımların maşın sürməsi haqda çox danışılıb, çox yazılsa da, bu dəfə fərqli mövzuya toxunacağıq. Avtomobil sürən xanımların tiplərindən bəhs edəcəyik. Bu tiplərin kişi sürücülərdən nə dərəcədə fərqli olduğunu isə siz xanımların öhdəsinə buraxırıq.


Birinci tip – İşgüzarlar

Onlar həmişə, harasa tələsirlər. Səbəb isə sırf işlə bağlıdır. Gecikməklə araları olmadığı üçün, maşını sürətlə idarə edirlər. Bəzən onların bir gündə gördüklərini, bəziləri heç bir həftə ərzində görə bilmirlər. Yol polisi tərəfindən saxlandıqda isə, uzun-uzadı debat qurmaq həvəsində olmurlar. İstənilən cəriməni ödəməyə hazırdılar, təki vaxtları boş yerə getməsin. Axı, söhbətə sərf edilən zaman onsuzda onlar üçün ən böyük cərimədir. Gün o gündən ki, onun maşınını cərimə meydançasına aparası olsunlar... Bu zaman nəinki debat, hətta dastan qurmağa hazır olurlar. Təki günahsız olduqlarını sübut etsinlər.

İkinci tip – Qərarsızlar

Onlar sürət həvəskarı deyillər. Yol hərəkətlərini isə kifayət qədər vaxtlı-vaxtında pozurlar. Qınamalı da deyil – normal sürətdə fikirləri ətrafda olan mağazaların üstünə böyük hərflərlə yazılan endirimlərdə, yol keçənlərin yanında olur. Sürət artanda isə... Ürəklərində ancaq “yaşamaq istəyirəm” kəlməsini azı 7 dəfə təkrarlayırlar. Bu tip sürücülərin daha bir çatışmayan cəhəti: hərəkət zamanı fikirlərini tam toplaya bilmədikləri üçün vaxta qənaət edə bilmirlər. Nəticəsi isə bir o qədər ürəkaçan olmur – saatlarla tıxacda qalmalı olurlar. Yol polisləri tərəfindən saxlandıqda isə bu tip xanımlar iki cür davrana bilərlər. Əgər xanım həlim xasiyyətlidirsə, yol polislərinin bəxti gətirir. Çünki belə xanımlar qorxaq və çəkingən olurlar. Aralarında öz hüquqlarını kifayət qədər yaxşı bilənlər də az deyil. Bax, bu zaman vəziyyət zərif cinsin nümayəndələrinin xeyrinə həll olunur.

Üçüncü tip – Nümayişkarlar

Bu tip xanımlar həmişə diqqət mərkəzində olmaq üçün dəridən-qabıqdan çıxırlar. Yolda avtomobili gah sürətlə, gah da çox yavaş idarə edirlər. Təki digərlərindən fərqlənsinlər. Yol hərəkəti qaydalarını pozduğu üçün saxlandıqda isə, çox həvəslə maşından düşür, səhvini öyrənməyə can atır. Cəriməni də ödəməyə hazırdırlar.

Dördüncü tip – Cəsarətlilər

Avtomobili prinsiplə idarə edirlər. Sürəti artırıb, qırmızı işıqdan keçmə onlar üçün artıq uşaq oynudur. Bu tip xanımlar elə hesab edirlər ki, onlar istədiklərini eləyə bilərlər. Bu xüsusiyyət başqalarına problem yaradır? Nə olsun, təki hər şey xanımların ürəyincə olsun. Cəsarətlilərin fikrincə, kim ki yol qaydalarına riayət edir, maşını yaxşı sürür, onlar da günahkardırlar. Hər vəziyyətdə hamı suçludur, ondan başqa.

Beşinci tip – XırdaçılarBu xanımlar maşın sürdüyü müddətdə ən adi cərimənin qiymətindən də xəbərsizdirlər. Necə yaşayırsa, avtomobili də elə idarə edir. Qaydalar qarşı ciddidir. Yolda dəlisov hərəkətlər ondan çox uzaqdır.


Təbii ki, bu bölgü tamamilə özünü doğrultmaya bilər. Hər şey vəziyyətdən və avtomobili idarə edən xanımın əhvalından asılıdır. Bu beş tipdə olan hər hansı bir xüsusiyyət gün ərzində hər xanımın başına gələ bilər. Hər halda söhbət qadından gedir. Qadın isə zamanından və məkanından asılı olmayaraq hər zaman gözlənilməz və sehrli ola bilər.