O, İslam Rzayevin yaradıcılığına müraciət edib.
Aparıcı qismində özünü sınayan Faiq Ağayev artıq bir neçə aydır ki, tamaşaçıların qarşısına çıxmağa hazırlaşır. Sosial yönümdə olan verilişin keyfiyyətli alınması üçün dəridən-qabıqdan çıxan müğənni bunu tamaşaçılara təqdim etməmiş, yeni bir veriliş aparmaq təklifi alıb. Belə ki, sözügedən veriliş idman sahəsinə aiddir. Yaxın günlərdə hər iki layihəsini tamaşaçılara təqdim etməyə hazırlaşan müğənni öz üzərində ciddi çalışdığını söylədi. Eyni zamanda o, şoumen Murad Dadaşovdan bu sahədə xüsusi məsləhətlər aldığını da gizlətmədi. Bununla yanaşı, səhnə fəaliyyətinin 20 illiyini qeyd edən Faiq Ağayev 2008-ci ildə keçirəcəyi konsertdə yeni repertuar və fərqli səhnə dekorasiyası ilə tamaşaçıları heyran edəcəyini də vurğaladı. Estrada müğənnisi kimi sevilən müğənni bu dəfə konsertdə bir neçə xalq mahnısı səsləndirəcək. Buna görə də o, xalq artisti, xanəndə İslam Rzayevin repertuarına müraciət edib.