Bəxtiyar Vahabzadə - Deyil mi?

[sus-qun]

Ömür başdan-başa, beşikdən ─ qəbrə
Həyatın sevinci, qəmi deyilmi?
Ölüm bir ömürlük iztirabların ─
Ağrının, acının cəmi deyilmi?

•••••

Mə`nəvi dünyaya qalxıb ucalmaq
Qanadlı duyğuya qismətdir ancaq,
Beləysə, ömürdən, gündən kam almaq
Hər Kəsin arzusu, kamı deyilmi?

•••••

Keçir məqamlar da gündə yüz əldən,
Hansı gizli əldir pozan, düzəldən.
Sənin güvəndiyin Dünya əzəldən
Əkilən, biçilən zəmi deyilmi?

•••••

Ayaqlar altında yer oldu tapdaq,
Sirrini, məğzini bilmədik ancaq.
Tapdaq etdiyimiz bu qara torpaq
Əbədi mənzilin damı deyilmi?

•••••

Damımız üstündə gəzər, hey gəzər,
Hərə öz qəlbiycə bir mənzil bəzər.
Torpağı sormaqdan etmədik həzər,
Bu da ağlımızın kəmi deyilmi?

•••••

Ötəri mənzildə qədər hökm edər,
Kimimiz bal içər, kimimiz zəhər.
Əbədi mənzildə hamı ─ bir nəfər,
Bir nəfər özü də hamı deyilmi?

[Damla1]

təşəkürlər cox gözəl idi
Allah rəhmət eləsin müəllifə